تین مبینہ مسلم تنظیموں نے پارلیمانی  پینل میٹنگ میں وقف بل کی حمایت کی,اپوزیشن ممبران بھی حیران

نئی دہلی: این ڈی اے اور حزب اختلاف کے ارکان کے درمیان گرما گرم تبادلہ خیال کے درمیان، تین مبینہ مسلم تنظیموں بشمول آر ایس ایس سے وابستہ، ایم آر ایم نے پارلیمانی پینل کے سامنے وقف قانون میں مجوزہ ترامیم کی حمایت کی، ذرائع نے یہ دعویٰ کیا ایم آر ایم کا معاملہ غیر متوقع نہیں وہ تو سنگھ کی ذیلی تنظیم ہے۔
جب تین مسلم تنظیموں – آل انڈیا صوفی سجادہ نشین کونسل، آر ایس ایس سے وابستہ راشٹریہ مسلم منچ اور این جی او بھارت فرسٹ – نے وقف (ترمیمی) بل پر مشترکہ کمیٹی کے سامنے الگ الگ اپنی پیشکشیں پیش کیں تو کچھ اپوزیشن اراکین نے ان کے دعووں  اور سفارشات میں خامیاں تلاش کرنے کی کوشش کی۔
کمیٹی میں شیو سینا کے رکن نریش مہاسکے کے بارے میں معلوم ہوا ہے کہ انہوں نے حزب اختلاف کے ارکان سے کہا ہے کہ وہ دوسری طرف کے نقطہ نظر کو سننے کے لیے اپنا دل کھلا رکھیں ، یہ تجویز این ڈی اے اور اپوزیشن کے درمیان بحث اور گرم الفاظ کے تبادلے کا باعث بنی۔
کچھ اپوزیشن ارکان نے یہ بھی تعجب کیا کہ کیا کمیٹی کے سامنے پیش ہونے والے فقیروں پر مشتمل صوفی شاہ ملنگ فرقہ مسلم کمیونٹی کا حصہ ہے؟
کمیٹی 26 ستمبر اور 1 اکتوبر کے درمیان ممبئی، احمد آباد، حیدرآباد، چنئی اور بنگلور کا سفر کرے گی تاکہ متعلقہ شہروں میں مختلف اسٹیک ہولڈرز سے ملاقات کرے۔
کمیٹی کے پے در پے اجلاسوں کے دوران، اپوزیشن اراکین نے کچھ سرخ لکیریں کھینچی ہیں، مثلا  وقف بائی یوزر کو حذف کرنے، ضلع کلکٹر کو یہ فیصلہ کرنے کا اختیار کہ پراپرٹی  وقف  ہے یا حکومت کی، وقف ٹربیونلز کا خاتمہ اور وقف کونسلوں میں غیر مسلم ممبر جیسے امور  ان کے لیے قابل قبول نہیں ہوں گے۔
اجمیر شریف درگاہ کے سرپرست کی زیر قیادت آل انڈیا صوفی سجادہ نشین کونسل (اے آئی ایس ایس سی) نے بل کے تحت آغاخانی اور بوہرہ وقف کی  تجویز کی طرز پر  ایک علیحدہ درگاہ بورڈ کے قیام کا مطالبہ کیا  کونسل نے کہا کہ درگاہوں، مسجدوں ، خانقاہوں، اماموں اور قبروں کی املاک کے تحفظ اور سجادہ نشینوں اور متولیوں کے حقوق کے تحفظ کے لیے درگاہ بورڈ کا قیام بہت ضروری ہے۔اے آئی ایس ایس سی نے کمیٹی سے ان رپورٹوں پر بھی وضاحت طلب کی کہ بل کی دفعہ 3 سی کے تحت مساجد، درگاہوں، خانقاہوں، اماموں اور قبروں کی جائیدادیں ضبط کی جائیں گی۔
کمیٹی کے چیئرمین جگدمبیکا پال نے اے آئی ایس ایس سی کے نمائندوں کو یقین دلایا کہ بل میں ایسی کوئی دفعہ  نہیں ہیں۔
مسلم راشٹریہ منچ کے نمائندوں میں تین فقیر بھی شامل تھے جنہوں نے مطالبہ کیا کہ صوفی شاہ  ملنگ برادری کے لیے ایک علیحدہ وقف بورڈ تشکیل دیا جائے جوزیادہ تر فقیروں پر مشتمل  ہو، جو کہ مسلمانوں  کا ایک ہندوستانی فرقہ ہے اور اس کی ابتدا کسی غیر ملکی سرزمین سے نہیں ہوتی۔انہوں نے دعویٰ کیا کہ صوفی شاہ ملنگ فرقے کی 3.75 لاکھ سے زیادہ درگاہیں/خانقاہیں/مظہر ملک بھر میں پھیلے ہوئے ہیں جن کی حفاظت کی ضرورت ہے۔
بھارت فرسٹ این جی او نے وقف (ترمیمی) بل کو قانون سازی کا ایک اہم حصہ قرار دیا، جو ملک بھر میں رجسٹرڈ وقف املاک کے انتظام میں انقلاب لانے کے لیے تیار کیا گیا ہے۔
اس میں کہا گیا ہے کہ وسیع اراضی اور مالی وسائل کو کنٹرول کرنے کے باوجود وقف بورڈ مسلم کمیونٹی کے لیے ان کا معنی خیز سماجی و اقتصادی فوائد میں ترجمہ کرنے میں ناکام رہے ہیں۔این جی او نے کہا کہ ناقص ریکارڈ کیپنگ، تجاوزات اور نگرانی کی کمی نے وقف املاک کے موثر انتظام میں رکاوٹ ڈالی ہے۔ (پی ٹی آئی ان پٹ کے ساتھ)