کولکاتا :
ترنمول کانگریس کی رکن پارلیمنٹ نصرت جہاں نے بدھ کے روز اپنے شوہر نکھل جین سے علیحدگی کا اعلان کردیا۔ انہوں نے نکھل پر اپنے اکاؤنٹ سے پیسے نکالنے کاالزام لگایا ہے ۔ نصرت نے کہاکہ الگ تو ہم پہلے ہی ہوگئے تھے، لیکن میں یہ بات آج سب کے سامنے رکھ رہی ہوں،کیونکہ میں چاہتی تھی کہ پرسنل لائف کو اپنے تک ہی رکھوں۔
نصرت نے کہاکہ ہماری انٹرکاسٹ میرج تھی۔ اسے بھارت میں قانونی ثابت کرنے کے لیے اسپیشل میرج ایکٹ کے تحت رجسٹرڈ کیا جانا تھا۔ جو کہ کبھی نہیں ہوا۔ ایسے میں طلاق کا تو سوال ہی نہیں اٹھتاہے۔
نصرت کا نکھل پر الزام ، اکاؤنٹ سے غلط طریقے پیسے نکالے
نصرت نے اپنے بیان میں کہا ہے ، ‘وہ جو اپنے آپ کو امیر کہتا ہے، جو کہتاہے کہ میں نے اس کا استعمال کیا۔ اس نے میرے اکاؤنٹ سے غلط طریقے سے پیسے نکالے۔ غلط طریقے سے مطلب میری علیحدگی کے بعد بھی اس نے رات کے وقت اکاؤنٹ سے پیسے نکالے تھے۔ میں نے یہ معاملہ بینک افسران کے سامنے بھی رکھا ہے اور اسے لے کر جلد ہی پولیس میں شکایت بھی فائل کی جائے گی۔
شادی کے بعد میرے تمام فیملی اکاؤنٹ کی تفصیلات نکھل کو دی گی تھیں۔ وہ میرےکئی اکاؤنٹ کابغیر میرے علم اور رضامندی کے غلط استعمال کررہا تھا۔ میں ابھی بھی اسے لے کر بینک سے بات چیت کررہی ہوں اور ضرورت پڑی تو اس بات کے ثبوت بھی رکھوں گی۔
