لکھنؤ: (ایجنسی)
وزیر اعلیٰ یوگی آدتیہ ناتھ کی قیادت میں بی جے پی نے ریاست میں ایک بار پھر حکومت بنانے کے لیے اسمبلی انتخابات کے ٹکٹوں کی تقسیم کا فارمولہ طے کرلیا ہے۔ اگر ٹکٹ کی تقسیم پارٹی کے فارمولے کے مطابق کی گئی تو اسمبلی انتخابات 2022 میں 150 سے زائد امیدوار بدل جائیں گے۔ ان میں 2017 کے انتخابات جیتے اور ہارے امیدوار بھی شامل ہیں ۔
ذرائع کے مطابق ساڑھے چار سال تک تنظیم اور حکومت کی سرگرمیوں میں غیر فعال رہنے والے ایم ایل اے کے ٹکٹ کاٹے جائیں گے ۔ وہیں ساڑھے چار سال میں وقتاً فوقتاً متنازع بیان بازی کرکے تنظیم و سرکار کو کٹہرے میں کھڑا کرنے والے ایم ایل اے پر نژلہ گرے گا ۔ 70 سال کی عمر پار کرچکے ، مختلف قسم کی سنگین بیماری سے دو چار ممبران اسمبلی کے ٹکٹ بھی کاٹے جائیں گے۔
پارٹی کا خیال ہے کہ جن ممبران اسمبلی سے مقامی عوام ، کارکنان ،تنظیم کے عہدیدار ناراض ہیں ان کی جگہ نئے چہرے کو موقع دینے سے فائدہ ہوگا ۔ ساتھ ہی جن ممبران اسمبلی پر وقت وقت پر الگ الگ قسم کے الزامات لگتے رہے ہیں ان ممبران اسمبلی کو بھی ٹکٹ دینے سے پارٹی پرہیز کرے گی ۔ اسمبلی انتخابات 2017 میں زیادہ فرق سے ہارے امیدواروں کو بھی پھر سے میدان میں اتارنےکا خطرہ اٹھانے سے پارٹی بچے گی۔
ذرائع کے مطابق قومی صدر جے پی نڈا کی جانب سے امیدواروں کے انتخاب کے لیے ایک سروے کیا جا رہا ہے۔ وزیر داخلہ امت شاہ کے سطح پر بھی مختلف ایجنسیوں کے ذریعہ سروے کرایا جا رہاہے ۔ ادھر وزیر اعلیٰ یوگی آدتیہ ناتھ اضلاع کا دورہ کرکے انتخابی فیڈ بیک لینے کے علاوہ مختلف سطح سے سروے کرا رہے ہیں ۔
