لکھنؤ :(ایجنسی)
اتر پردیش میں چوتھے مرحلے کے لیے 23 فروری کو ووٹ ڈالے جائیں گے۔ چوتھے مرحلے میں اترپردیش کے 9 اضلاع کی 59 سیٹوں پر ووٹنگ ہوگی۔ ان 9 اضلاع میں پیلی بھیت، لکھیم پور کھیری، سیتا پور، ہردوئی، لکھنؤ، اناؤ، رائے بریلی، فتح پور اور باندہ شامل ہیں۔ چوتھے مرحلے کے لیے انتخابی مہم بھی آج شام 6 بجے ختم ہو جائے گی۔ اترپردیش میں 27 فروری کو پانچویں مرحلے کی پولنگ ہوگی۔ پانچویں مرحلے میں 11 اضلاع کی 61 سیٹوں پر پولنگ ہوگی۔
نیوز 18 کی ایک رپورٹ کے مطابق، چوتھے اور پانچویں مرحلے میں 70 سیٹوں پر راشن، سانڈ، سیکورٹی، وقار اور مسلمان لفظ سب سے زیادہ سننے کو مل رہے ہیں۔ اس سے ظاہر ہوتا ہے کہ چوتھے اور پانچویں مرحلے میں ووٹنگ ذات پر ہوگی۔ اترپردیش میں مرکزی اور ریاستی حکومتوں کی طرف سے دیا جانے والا مفت راشن بی جے پی کے لیے رامبان کا کام کر رہا ہے۔ لوگ یہ بھی مانتے ہیں کہ راشن ویکسین کی دوسری خوراک سے زیادہ موثر ہے۔اتر پردیش کے انتخابات میں سماج وادی
پارٹی نے سانڈوں کا مسئلہ اٹھایا اور کہا کہ لوگ سانڈ سے پریشان ہیں، کیونکہ وہ لوگوں کے کھیت کو برباد کر رہے ہیں۔ سماج وادی پارٹی ووٹروں سے لگاتار کہہ رہی ہے کہ مفت میں راشن بھلے ہی ملا ہے، لیکن سانڈوںنے آپ کے کھیت کو برباد کردیاہے ۔ گاؤں کے لوگوں نے بھی کہاکہ سانڈوں سے کھیتوں کو بچانا سردردبن چکاہے ۔
بی جے پی لیڈروں کا بھی ماننا ہے کہ سانڈ کا مسئلہ ایک بڑا مسئلہ ہے اور یہ صورتحال یوگی حکومت کی جانب سے غیر قانونی مذبح خانوں پر پابندی لگانے کے بعد پیدا ہوئی ہے، لیکن 10 مارچ کے بعد اس کا بھی حل نکالا جائے گا۔ وزیر اعظم مودی نے اتوار کو اپنی اناؤ ریلی کے دوران کہا تھا کہ آوارہ جانوروں سے درپیش مسائل سے نمٹنے کے لیے 10 مارچ کے بعد نئے انتظامات کیے جائیں گے۔
سلامتی اور احترام:
اترپردیش انتخابات میں تین جملے – سلامتی ، وقار اورمسلمان خوب سننے کومل رہے ہیں۔ حفاظت اور وقار ایک بڑا مسئلہ ہے۔ خواتین کا ماننا ہے کہ پچھلے 5 سالوں میں امن و امان کی صورتحال بہتر ہوئی ہے۔ انہیں بھی عزت ملی ہے۔ پردھان منتری آواس یوجنا کے تحت فراہم کیے گئے مکانات اور اجولا اسکیم کے تحت گیس کنکشن خواتین کو بی جے پی کی طرف راغب کر رہے ہیں۔
ساتھ ہی اترپردیش کے انتخابات میں لفظ ذات کے ساتھ عزت جڑی ہوئی ہے کیونکہ یوگی حکومت پر ٹھاکر ازم کا بھی الزام ہے۔ یادو سماج کے لوگوں کو لگتا ہے کہ پچھلے 5 سالوں میں ان کی عزت کو ٹھیس پہنچی ہے اور اس کی وجہ یوگی حکومت کی پالیسیاں اور بی جے پی لیڈروں کے بیانات ہیں۔
ایس پی کے ساتھ مسلمان:
اس بار اتر پردیش کا اسمبلی الیکشن کئی لحاظ سے پہلے کے انتخابات سے کافی مختلف ہے۔ اتر پردیش میں مسلمان بی ایس پی، ایس پی اور کچھ کانگریس میں بٹ جاتے تھے۔ لیکن 2022 کے اسمبلی انتخابات میں مسلم کمیونٹی کے لوگ واضح ہیں کہ اگر وہ بی جے پی کو ہرانے کے لیے ووٹ دینا چاہتے ہیں تو انہیں سماج وادی پارٹی کو ووٹ دینا ہوگا۔ مسلم سماج کے لوگوں کا ماننا ہے کہ اگر وہ ایس پی کے علاوہ کسی اور پارٹی کو ووٹ دیتے ہیں تو مسلم ووٹوں میں تقسیم ہوگی اور اس کا فائدہ بی جے پی کو ہوگا۔
2017 کے اسمبلی انتخابات میں، بی جے پی نے وسط یوپی میں 85 فیصد سے زیادہ سیٹیں جیتیں۔ تب مسلم ووٹ ایس پی اور بی ایس پی کے درمیان تقسیم ہو گیا۔ تاہم اس بار ایسا دکھائی نہیں دے رہا ہے اور اگر مسلمان یکمشت ووٹ دیتے ہیں تو بی جے پی کو کچھ سیٹوں پر نقصان اٹھانا پڑ سکتا ہے۔
