گائے اسمگلنگ کے ملزموں کے ساتھ انکاؤنٹر کے بعد یوپی پولس سوالوں کے گھیرے میں، فلمی اسٹائل میں نظر آئے زخمی

غازی آباد : (ایجنسی)

اترپردیش کے غازی آباد میں لونی بارڈر پولیس اسٹیشن کی گائے کے اسمگلروں کے ساتھ انکاؤنٹر اب سوالوں کےگھیرے میں ہے۔ بتادیں کہ اس مڈبھیڑ میں سات لوگوںکو گھٹنے سے کچھ انچ نیچے گولی لگی ہے۔ تمام کو ایک ہی جگہ پر گولی لگنے کو لے کر یہ انکاؤنٹر زیر بحث ہے۔ قابل ذکر ہے کہ اس ساتوں کو پولیس نے گئو کشی کے الزام میں پکڑا ہے۔ وہیں گودام سے دو بائک، تین جانوروں کی لاش، 7 طمنچے، کارتوس و دیگر سامان برآمد کئےگئے۔

بتا دیں کہ معاملہ11 نومبر کی صبح 6.10 بجے کا ہے۔ بیہٹہ حاجی پور میں ایک کباڑ گودام پر پولیس نےممنوعہ جانور کاٹنے کا کام ہو رہا تھا۔ اس میں سات اسمگلروں کو مڈبھیڑ کے بعد گرفتار کیا ۔ یہ مڈبھیڑ اب بحث کا موضوع بنا ہوا ہے۔

درحقیقت زخمی ملزمین کی جو تصویر سامنے آئی ہے اس میں وہ ایک ساتھ اسپتال میں ایک پتھر کی بنچ پر فلمی انداز میں بیٹھے ہیں۔ سبھی کو تقریباً ایک ہی جگہ پر ایک ٹانگ میں گولی ماری گئی ہے۔ ان کے کپڑوں پر خون کے چھینٹے نظر آ رہے ہیں۔

پولیس کا کہنا ہے کہ بدمعاشوں نے چھاپہ مارنے کے لیے گئی پولیس پر سات راؤنڈ فائرنگ کی، لیکن وہ اپنا نشانہ چوک گئے۔ ایک گولی پولیس کی گاڑی کو لگی۔ ایسے میں غازی آباد پولس گائے کے اسمگلروں کے انکاؤنٹر کو لے کر سوالوں میں گھیر میں ہے۔ ساتھ ہی یہ بات بھی سامنے آئی ہے کہ انکاؤنٹر میں ایک نابالغ کو گولی مار دی گئی۔

پولیس نے بتایا کہ نابالغ ہونے کا دعویٰ کرنے والے نوجوان کی عمر کی جانچ کی جارہی ہے۔ وہیں مڈبھیڑ کے بعد 11 نومبر کو پولیس کے ذریعہ جاری ایک پریس ریلیز میں کہا گیا تھا کہ گئو کشی کو لے کر ملی اطلاع پر جب پولیس کی ٹیم گودام پر چھاپہ ماری کے لیے گئی تو ملزمین نے سات راؤنڈ فائرنگ کی اور جوابی کارروائی میں پولیس نے 13 بار گولیاں چلائی، جس سے تمام ملزمین کے پیر میں چوٹ لگی۔

پولیس نے بتایا کہ ملزمان کے قبضے سے جانوروں کی تین لاشیں، سات دیسی ساختہ پستول، دو کلہاڑیاں، پانچ چاقو اور پلاسٹک کی تار کے دو بنڈل برآمد ہوئے ہیں۔ گرفتار کیے گئے شعیب کے والد اسلام نے ان سات افراد کی ٹانگ میں گولی مارے جانے کے بارے میں کہا، ’’ان کے بیٹوں کو ان کے مذہب کی وجہ سے پھنسایا جا رہا ہے۔ مسلمانوں کو ایسے الزامات میں پھنسانا آسان ہے۔

اس نے کہا کہ یہ لڑکے کچھ اور نہیں صرف بلی کا بکرا ہیں۔ اگر پولیس افسر کا نشانہ اتنا ہی درست ہے تو وہ پولیس میں کیا کررہا ہے؟ اسے کھیلوں میں ہندوستان کی نمائندگی کرنی چاہئے۔

فی الحال اس معاملے میں انسپکٹر راجندر تیاگی کو ایس ایس پی نے اندرا پورم تھانے میں ٹرانسفر کر دیا ہے۔ بتایا جا رہا ہے کہ ٹرانسفر سے پریشان تیاگی نے کچھ دنوں کے لیے چھٹی پر جانے کی بات کہی۔