نئی دہلی: سرکاری ملازمت کے خواہشمند امیدواروں کے لیے اچھی خبر ہے۔ یونین پبلک سروس کمیشن (UPSC) نے مرکزی حکومت کی مختلف وزارتوں اور محکموں میں متعدد عہدوں پر براہِ راست بھرتی کے لیے آن لائن درخواستیں طلب کر لی ہیں۔ امیدوار 17 جولائی 2026 تک درخواست جمع کرا سکتے ہیں۔
UPSC کی جانب سے جاری نوٹیفکیشن کے مطابق بھرتی مختلف شعبوں میں کی جائے گی، جن کے لیے تعلیمی قابلیت اور تجربے کی شرائط بھی مختلف ہیں۔ آسامیوں میں محکمہ زراعت و کسان بہبود میں جوائنٹ ڈائریکٹر، وزارت آیوش میں میڈیکل آفیسر/ریسرچ آفیسر (سدھا)، ڈائریکٹوریٹ جنرل آف سول ایوی ایشن (DGCA) میں ایروناٹیکل آفیسر اور لیگل آفیسر، وزارتِ کارپوریٹ امور میں کمپنی پراسیکیوٹر، آرکیالوجیکل سروے آف انڈیا (ASI) میں ڈپٹی سپرنٹنڈنگ آرکیالوجسٹ اور وزارت دفاع میں سینئر فوٹوگرافک آفیسر سمیت دیگر عہدے شامل ہیں۔
آن لائن درخواست کیسے دیں؟
امیدوار UPSC کی آفیشل ویب سائٹ upsconline.nic.in پر جا کر One Time Registration (OTR) مکمل کریں یا پہلے سے موجود اکاؤنٹ سے لاگ اِن کریں۔ اس کے بعد مطلوبہ معلومات درج کریں، ضروری دستاویزات، تصویر اور دستخط اپ لوڈ کریں، مقررہ فیس ادا کرکے فارم جمع کرا دیں۔ درخواست جمع کرانے سے پہلے امیدواروں کو ہدایت دی گئی ہے کہ وہ نوٹیفکیشن میں دی گئی عمر، تعلیمی قابلیت اور دیگر شرائط کو اچھی طرح پڑھ لیں تاکہ کسی قسم کی غلطی سے بچا جا سکے۔
17 جولائی آخری تاریخ
کمیشن کے مطابق آن لائن درخواست جمع کرانے کی آخری تاریخ 17 جولائی 2026 مقرر کی گئی ہے۔ اس کے بعد کسی بھی امیدوار کی درخواست قبول نہیں کی جائے گی۔ امیدواروں کو مشورہ دیا گیا ہے کہ آخری وقت میں ویب سائٹ پر بڑھتے ہوئے ٹریفک یا تکنیکی مسائل سے بچنے کے لیے بروقت درخواست مکمل کریں۔
