نئی دہلی : (ایجنسی)
انڈیاٹو ڈے کانکلیو 2021- میں آسام کے سی ایم ہیمنت بسواسرما نے کہا کہ انہیں الیکشن میں مسلمانوں کا ووٹ نہیں چاہئے۔ اپنے تلخ بیانوں کی وجہ سے خبروں میں بنے رہنے والے سی ایم بسوا سرما نے کہاکہ انہوں نے طے کر لیا ہے کہ انہیں مسلم ووٹ نہیں چاہئے، لیکن اس کا مطلب یہ نہیں کہ اپنے دور حکومت میں وہ ان کے لیے کام نہیں کریں گے ۔ سی ایم نے کہا کہ پانچ سال وہ سی ایم بن کر رہیں گے اور ان کے لیے بھی ترقیاتی کام کریں گے۔
انڈیا ٹوڈے سیشن کے دوسرے دن ہیمنت بسوا سرما نے آسام ، این آر سی ، مسلم پولرائزیشن ، بیف جیسے حساس مسائل پر کھل کر جواب دیا۔ وزیر اعلیٰ سرما نے کہا کہ آسام میں مسلم سمیت تمام طبقات کے لیے ترقیاتی کام ہو رہا ہے، لیکن بحث صرف تجاوزات ہٹاؤ مہم کی ہوتی ہے ۔
سی ایم نے کہاکہ انہوں نے پی ایم آواس کے تحت 4.5لاکھ آواس مسلمانوں کو دئے جارہے ہیں۔ ہم اپنے آسام کےمسلمانوں کے ساتھ ڈائیلاگ کررہے ہیں ان کی بہتری کے لیے کام کررہے ہیں ۔
ان سے پوچھا گیاکہ آپ پھر ایسا کیوں کہتے ہیں کہ آپ کو ’میاں ‘ ووٹ نہیں چاہئے؟ اس کے جواب میں انہوں نے ایک بار پھر صفائی سے کہاکہ ’ مجھے نہیں چاہئے بس اس لئے، میں نہیں چاہتا ہوں ،کیونکہ وہ نہیں دیں گے ‘
سی ایم ہیمنت بسوا سرما نے اپنی بات کو سمجھاتے ہوئے کہاکہ ’ اس سے پہلے کی آپ میری محبت کی تجویز کو ٹھکرا دیں ،کیوں نہ میں ہی پہلے آپ کو ٹھکرا دوں‘ ۔انہوں نے کہاکہ ان کے ساتھ ہمارا کوئی سیاسی رشتہ نہیں ہے ۔ میں جانتا ہوں کہ میاں ہمارے لئے ووٹ نہیں کریں گے ۔میں بھی ان کا ووٹ نہیں چاہتا ہوں، لیکن وہ ہمارےدوست بنیں گے ۔ میں ان کا دوست بنوں گا۔ پانچ سال ہم دوست رہیں گے ، ہم لوگ یقینی بنائیں گے کہ ترقی ہو۔
الیکشن کے دوران مسلم ووٹوں کا ذکر کرتے ہوئے سی ایم سرما نے کہاکہ جب الیکشن آتا ہے تو نہ تو وہ ہمیں ووٹ کریں گے نہ ہی انہیں مسلمانوں کا ووٹ چاہئے۔ بے کار میں دونوں فریقوں کو وقت کیوں برباد کرنا چاہئے۔ سی ایم نے کہاکہ یہ ایک طرح کا ڈیل ہے۔ ہم ان کے لیے کام کریں گے ۔ نہ تو میں انہیں ووٹ مانگ کر پریشان کروں گا ، نہ ہی وہ ہمیں ووٹ دیں گے ۔ کوئی ٹکراؤ نہیں ہوگا۔ فرقہ وارانہ کشیدگی کا سوال نہیں اٹھتا۔
اپنی انتخابی مہم کاذکر کرتے ہوئے آسام کے سی ایم سرما نے کہاکہ اپنی انتخابی تشہیر کے دوران وہ ان کے علاقوں میں نہیں گئے۔ نہ ہی وہ ان کے علاقے میں آئے ، اس لئے کسی طرح کا تشدد نہیں ہوا۔ الیکشن بہت پرامن طریقے سے ختم ہوگیا۔
ہمنت بسوا سرما نے کہا کہ الیکشن کے بعد وہ ان کے علاقے میں گئے۔ وہاں ایک چھوٹی بچی سے ریپ ہوا تھا۔ انہوں نے فوراً ملزم کو گرفتار کرایا۔ سی ایم نے بتایا کہ ان کا مسلم سماج کے ساتھ صحت مند رشتہ ہے اور دونوں کو معلوم ہے کہ کیا کرناہے؟
