سرسید احمدخان پر مبنی بائیوپک کو دوردرشن پر ٹیلی کاسٹ کرنے سے انکار،وجہ کیا بتائی؟

علی گڑھ مسلم یونیورسٹی (اے ایم یو) کے بانی سر سید احمد خان (1817-1898) پر مبنی پہلی بایوپک "سر سید احمد خان: دی مسیحا” حال ہی میں او ٹی ٹی پلیٹ فارم پر بین الاقوامی سطح پر ریلیز ہوئی۔  تاہم، دوردرشن نے اسے اپنے پرسار بھارتی OTT پلیٹ فارم پر نشر کرنے سے انکار کر دیا –  اس فلم کو حال ہی میں اے ایم یو کی وائس چانسلر نعیمہ خاتون نے یونیورسٹی کیمپس میں بہت دھوم دھام سے ریلیز کیا تھا۔یہ بائیوپک سر سید احمد خان کی زندگی پر مبنی ہے، جس میں محمڈن اینگلو اورینٹل (ایم اے او) کالج کے قیام میں ان کی محنت اور مسلم کمیونٹی میں سائنسی مزاج کی حوصلہ افزائی کے لیے ان کی کوششوں کو دکھایا گیا ہے۔  یہ کالج بعد میں 1920 میں اے ایم یو میں تبدیل ہوا۔
پرسار بھارتی کے پروگرام ایگزیکٹیو کی طرف سے ممبئی میں واقع ڈارک ہارس پروڈکشن کو بھیجے گئے خط میں کہا گیا ہے، "آپ کے ذریعہ پیش کردہ سر سید احمد خان پر مبنی پروگرام پرسار بھارتی OTT کے آنے والے پلیٹ فارم پر ٹیلی کاسٹ کے لیے قبول نہیں کیا جا سکتا۔”
اس بایوپک کے پروڈیوسر اور مرکزی اداکار شعیب چودھری اس فیصلے سے سخت دکھی ہیں۔  انہوں نے کہا، "میں نے دوردرشن کے لیے جو سیریل تیار کیا وہ دوردرشن کی تاریخ میں سب سے طویل عرصے تک چلا۔ یہ چونکا دینے والی بات ہے کہ سرسید پر مبنی اس بایوپک کو دوردرشن کے OTT پلیٹ فارم پر اسٹریمنگ کے لیے قبول نہیں کیا گیا۔ ایسا لگتا ہے کہ دوردرشن نے سیاسی دباؤ کی وجہ سے اس تجویز کو مسترد کر دیا ہے۔”
سرسید کی زندگی پر مبنی یہ بائیوپک ان کی سوانح حیات ’’حیات جاوید‘‘ پر مبنی ہے۔  فلم میں سرسید کی جدوجہد اور کوششوں کو دکھایا گیا ہے۔  اس کی وجہ سے وہ ہندوستانی مسلم کمیونٹی کے لیے تعلیم اور سماجی اصلاح کے لیے تحریک کا ذریعہ بنے۔  2020 میں اے ایم یو کی صد سالہ تقریبات کے دوران، وزیر اعظم نریندر مودی نے اے ایم یو کیمپس کو "منی انڈیا” قرار دیا۔