نئی دہلی :
کورونا وبا کے درمیان بابا رام دیو کے ایلوپیتھی کے خلاف دئے بیان پر انڈین میڈیکل ایسوسی ایشن نے سخت اعتراض کیا ہے۔ انڈین میڈیکل ایسو سی ایشن (آئی ایم اے) نے ہفتہ کو سوشل میڈیا پر وائرل ہوئی یوگا گرو رام دیو کی ویڈیوکا ذکر کیا ہے جس میں انہوں نے ایلوپیتھی کو اسٹوپٹ(بیوقوف) اور دیوالیہ سائنس قرار دیا ہے۔ آئی ایم اے نے مرکزی وزیر صحت ڈاکٹر ہرش وردھن سے مطالبہ کیا ہے کہ یا تو اس الزام کو قبول کریں اور جدید طبی سہولت ختم کردیں یا پھر رام دیو کے خلاف وبائی ایکٹ کے تحت کیس درج کرکے مقدمہ چلائیں۔
آئی ایم اے نے کہا ہے کہ ہندوستان کووڈ- 19 وبا کا سامنا کر رہا ہے اور جدید طبی نظام اور حکومت ہند لوگوں کی زندگیاں بچانے کے لئے مل کر کام کر رہی ہے۔ اس جدوجہد میں فرنٹ لائن پر کام کرنے والوں نے اپنی جانوں کانذرانہ پیش کیا ہے۔ وزیر صحت کے نوٹس میں رام دیو کی ویڈیو کولاتے ہوئے آئی ایم اے نے کہا کہ یوگا گرو اس میں کہہ رہے ہیں ،’ ‘ایلوپیتھ ایک اسٹوپٹ اور دیوالیہ سائنس ہے۔‘ آئی ایم اے نے رام دیو کے خلاف کارروائی نہیں کئے جانے پر قانونی چارہ جوئی کرنے کی دھمکی دی ہے ۔
آئی ایم اے نے کہا کہ بین الاقوامی سطح پر نامور یوگا گرو ہونے کے علاوہ بابا رام دیو ایک دوا ساز یونٹ کے تجربہ کار ہیں۔ وہ عوام کو گمراہ کرنے کے لیے اپنی کمپنی پروڈکٹوں کے بارے میں کئی بار جھوٹ بولتے نظر آئے ہیں۔ ایسوسی ایشن نے الزام لگایا کہ رام دیو صورت حال کا فائدہ اٹھانے کی کوشش کررہے ہیں اور بڑے پیمانے پر لوگوںمیں خوف اور مایوسی پیدا کررہے ہیں۔
ایسوسی ایشن نے کہا کہ وہ یہ کام اس لئے کررہے ہیں تاکہ وہ اپنی غیرقانونی اور غیر منظور شدہ نام نہاد دوائیں بیچ سکیں اور عوام کی قیمت پر پیسہ کما سکیں۔ آئی ایم اے نے کہا کہ رام دیو کے خلاف ایلوپیتھی ڈاکٹروں کی صلاح نہ لینے اور متعدد لوگوں کی جان کے لیے خطرے پیدا کرنے کے الزام میں ان کے خلاف قانونی چارہ جوئی کی جانی چاہئے۔
