لکھنؤ :
ملک میں کسان آندولن اور کانگریس کے بعد اب اتر پردیش کے وزیر اعلیٰ یوگی آدتیہ ناتھ کا مبینہ ٹول کٹ سامنے آئی ہے۔ سی ایم یوگی کے سوشل میڈیا اکاؤنٹس کو سنبھالنے والی ٹیم اس حوالے سے تنازعات میں گھر گئی ہے۔
اس ٹول کٹ کا ایک آڈیو وائرل ہوا ہے۔ اس میں وزیر اعلیٰ کی حمایت میں ٹویٹ کرنے کے لئے دو روپے دینے کی بات کہی جارہی ہے۔ اس مبینہ آڈیو کو وزیر اعلیٰ کے سوشل میڈیا اکاؤنٹ کو سنبھالنے والی ٹیم کے ممبر ان کی بتائی جارہی ہے ، اسے ریٹائرڈآئی اے ایس سوریہ پرتاپ سنگھ نے سوشل میڈیا پر شیئر کی ہے ۔
آن لائن ہندی پورٹل ’ دینک بھاسکر ‘ کے مطابق مبینہ ٹول کٹ وائرل ہوتے ہی آئی ٹی سیل کے لیڈر منموہن سنگھ کو کمپنی سے فارغ کردیا گیا ہے۔ تاہم کمپنی کی طرف سے ابھی تک کوئی سرکاری بیان سامنے نہیں آیا ہے۔ اسی دوران بی جے پی کے ترجمان منیش شکلا نے بی جے پی اور وزیر اعلیٰ کو پورے معاملے سے الگ بتایا۔ انہوں نے کہا کہ یہ نجی کمپنی اور اس کے ملازم سے متعلق معاملہ ہے۔کوئی کمپنی کس ملازم کو رکھتی ہے کس کو نکالتی ہے اور کیسے کام کرتی ہے یہ اس کا اپناحق ہے۔
منموہن نے لکھا – ’میری خاموشی کتنے سوالوں کی آبرو رکھ لے گی‘
کمپنی سے برطرفی کئے جانے کے بعد منموہن سنگھ نے سوشل میڈیا پر ایک پوسٹ شیئر کی۔ اس میں شاعرانہ اندازمیں لکھا:’ ہزار جوابوں سے اچھی ہے ہماری خاموشی،نہ جانے کتنے سوالوں کی آبرو رکھ لے گی۔‘ اس پوسٹ کو ان کے برطرف کئے جانے سے جوڑ کر دیکھاجا رہاہے۔ ’دینک بھاسکر‘ نے منموہن سنگھ سے فون پر اس کے بارے میں پوچھا تو انہوں نے کچھ بولنے سے انکار کردیا۔
وائرل آڈیو میں کیا ہے؟
پہلا شخص: یہ بتاؤ کہ یہ دو روپے ٹویٹ کس حساب سے ملتا ہے ؟
دوسرا شخص: بھائی ، یہ 100+ فالوآورس کے لئے ہےبھائی۔
پہلا شخص : اچھا یہ بتاؤکہ کون سا ہیش ٹیگ ہوگا؟
دوسرا شخص: گروپ میں ڈالا تو ہے ہیش ٹیگ
پہلا شخص: یوگی جی والا ہیش ٹیگ؟
دوسرا شخص: ہاں… یوگی جی والا ہیش ٹیگ
دوسرا شخص : کوئی مسئلہ؟
پہلا شخص: نہیں .. ہم زیادہ سے زیادہ کرانا چاہے رہے ہیں ، جس سے تھوڑا بڑھ جائے۔
دوسرا شخص: اس میں تھوڑا کم پیمنٹ بچا ہے ،کیونکہ 25 ٹویٹ مانگ رہاہے ،دوسرا یہ کہ ہیش ٹیگ کے ساتھ… یوگی جی کے فیور میں۔ مطلب یوگی جی کے بارے میں اچھا لکھو۔
پہلا شخص: کس کاٹرینڈ ہے؟
دوسرا شخص: یہ تم چھوڑو نا۔ یہ اتل جی کا یہ ٹرینڈ ہے۔ گجیندر چوہان کا ٹرینڈ ہے۔تم ایک آئی ڈی سے 25 ٹویٹ کراؤ ، اس کا پیمنٹ کر دیں گے۔
پہلا شخص: ٹھیک
دوسرا شخص: سب کا لنک گروپ میں ڈالنا دینا ۔ جلد کراؤ، فوٹو کے ساتھ
(یہیں سے فون کٹ ہو جاتاہے )
تنازعہ کیا ہے؟
دراصل اب تک سی ایم یوگی کے سوشل میڈیا اکاؤنٹ کو سنبھالنے کی ذمہ داری بی ای سی آئی ایل نام کی کمپنی کے پاس تھی۔ کچھ دنوں پہلے اسے ہٹا کر سلیور ٹیک کمپنی کو اس کی ذمہ داری دے دی گئی۔ منموہن سنگھ بی ای سی آئی ایل کمپنی میں کام کرتے تھے، بتایا جارہاہے کہ نئی کمپنی اپنے طرح سے سارے کام کو ٹیک اوور کرنا چاہتی ہے۔ یہ آڈیووائرل ہونے کے بعد منموہن سنگھ کو کمپنی سے باہر نکال دیا گیا ہے۔
