نئی دہلی: (ایجنسی)
قومی دارالحکومت دہلی میں بدھ کی صبح شدید بارش ہوئی، جس کی وجہ سے کئی علاقوں میں پانی جمع ہوگیا۔ پانی جمع ہونے کی وجہ سے دہلی اور اس کے ملحقہ علاقوں بشمول نوئیڈا ، غازی آباد ، گروگرام میں ٹریفک جام رہا اور لوگوں کو پریشانی کا سامنا کرنا پڑا۔
واضح رہے کہ دہلی-این سی آر میں بارش کے سبب سڑکوں پر گاڑیوں کی رفتار سست ہو گئی اور گاڑیوں کی لائٹیں جلانی پڑ رہی ہیں۔ شدید بارش کی وجہ سے کئی مقامات پر ٹریفک جام کا مسئلہ پیدا ہو گیا ہے اور کئی علاقوں میں صبح سے پانی جمع ہونا شروع ہو گیا ہے۔ محکمہ موسمیات نے دہلی میں شدید بارش کے امکان کے پیش نظر اورنج الرٹ جاری کیا ہے۔
محکمہ موسمیات کی پیشن گوئی کے مطابق دہلی میں وقفے وقفے سے بارش آج دن بھر جاری رہی۔ ایسی صورت حال میں دفتر آنے اور جانے میں مشکلات کا سامنا کرنا پڑ سکتا ہے۔ بارش کی وجہ سے دہلی کا ایمس فلائی اوور، رنگ روڈ پر حیات ہوٹل کے قریب، ساوتری فلائی اوور کے دونوں جانب، مہارانی باغ، دھولا کنواں سے 11 مورتی روڈ، شاہجہان روڈ، آئی ٹی او کا ڈبلیو پوائنٹ، لالہ لاجپت رائے مارگ اور مول چند انڈر پاس کے قریب لوگوں کو پانی جمع ہونے کی وجہ سے پریشانی کا سامنا کرنا پڑ رہا ہے۔
دہلی میں آج کی بارش نے ریکارڈ قائم کر دیا ہے۔ 2009 کے بعد ستمبر میں کسی ایک دن میں اتنی بارش نہیں ہوئی۔ 10 ستمبر 2009 کو دہلی میں 93.8 ملی میٹر بارش ریکارڈ کی گئی تھی، جبکہ، گزشتہ 24 گھنٹوں میں صفدرجنگ علاقہ میں 112.1 ملی میٹر، لودھی روڈ پر 120.2 ملی میٹر، پالم میں 71.1 ملی میٹر اور آیا نگر میں 68.2 ملی میٹر بارش درج کی گئی۔
دہلی میں زیر آب سڑکوں اور ٹریفک جام کے درمیان کئی ویڈیو اور تصاویر آن لائن شیئر کی گئی ہیں جس میں سڑکوں پر گاڑیوں کی لمبی قطاریں نظر آرہی ہیں۔ ایک ویڈیو میں پانی جمع ہونے والے دوارکا انڈر پاس کو پار کرنے کے لیے جد وجہد کرتےکئی گاڑی نظر آرہی ہیں ۔ جنوبی – مغربی دہلی کے منریکا میں بھی بھاری پانی جمع ہونے کی اطلاع ملی ۔ اس وجہ سے وہاں بازار بند رہے ۔
