نئی دہلی : (ایجنسی)
ہندی نیوز چینل آج تک پر حال ہی میں ہوئے ایک لائیو ڈبیٹ کا ویڈیو سوشل میڈیا پر خوب وائرل ہو رہاہے ۔ جس میں نظر آرہا ہے کہ ڈبیٹ میں شامل ایک پینلسٹ جیسے ہی اڈانی پورٹ پر ملے ڈرگس کا مدعا اٹھاتے ہیں تو شو کی اینکر چترا ترپاٹھی آرین خاں کی گرفتاری کے بارے میں بتانے لگ جاتی ہے۔ ڈبیٹ کے حصہ کا چھوٹا سے ویڈیو شیئر کرتے ہوئے سوشل میڈیا یوزر اب ’آج تک‘ اور ان کی اینکر چترا ترپاٹھی کو جم کر ٹرول کررہے ہیں ۔
دراصل سوشل میڈیا پر وائرل ہونے والی اس 13 سیکنڈ کی ویڈیو میں دیکھا جا سکتا ہے کہ آج تک پر لائیو ڈبیٹ کے دوران شیوسینا ترجمان آنند دوبے اڈانی پورٹ پر ملے ڈرگس کا مدعا اٹھاتے ہوئے کہتے ہیں ’’ ابھی کچھ دنوں پہلے کی بات ہے کہ 22 یا 23 ستمبر کو اڈانی پورٹ پر (بندرگاہ) ڈرگس ملا تھا۔ ‘‘
دوبے کے اتنا کہتے ہی چترا ترپاٹھی کہنے لگ جاتی ہے کہ ’ چلئے ٹھیک ہے آپ اپنی بات پوری کیجئے ۔ اس وقت کی بڑی خبر اپنے ناظرین کو دیتے ہیں، جن دفعات کے تحت آرین خان کی گرفتاری ہو ئی ہے ۔‘
ڈبیٹ کے حصے کایہ چھوٹا سا ویڈیو اب سوشل میڈیا پر خوب وائرل ہو رہا ہے ۔ یوزر اس ویڈیو کو شیئر کرتے ہوئے آج تک اور ان کی اینکر چترا ترپاٹھی کو جم کر ٹرول کر رہے ہیں۔ ایک یوزر نے لکھا ’ایسی صحافت اور اس طرح کے صحافیوں کو گالی دینا بھی گالی کی توہین لگتی ہے ۔ ان کے لیے کوئی بھی توہین آمیز الفاظ نہیں بچا اور کسی بھی توہین آمیز جملہ بولنا اس جملہ کی توہین کرنا ہے ۔‘
واضح رہے کہ گجرات کے کچھ میں مندرا بندر گاہ پر حال ہی میں 19,000کروڑ روپے سے زیادہ قیمت کی تقریباً 3,000کلوگرام ہیروئن ملی تھی۔ مندرا بندر گاہ سے 3,000کلوگرام ہیروئن ملنے کے بعد بھی گودی میڈیا کے ٹی وی اینکر نے اس پر ایک پر اسرار خاموشی بنائی رکھی ۔ مندر اپورٹ کا مالکانہ حق اڈانی پورٹ کے پاس ہے اور اڈانی پورٹ صنعتکار گوتم اڈانی کی کمپنی ہے ۔ وہیں کروز ڈرگس کیس معاملے میں اداکار شاہ رخ خاں کے بیٹے آرین خان کی گرفتاری کے بعد سے اس معاملے پر میڈیا زور شور سے ٹی وی شو کا اہتمام کررہی ہے ۔
