نئی دہلی :(ایجنسی)
اپنی سیاسی پارٹی کے قیام کے ساتھ ہی کسان رہنما گرنام سنگھ چڈھونی نے اعلان کیا کہ وہ اگلے سال پنجاب اسمبلی کا الیکشن لڑیں گے۔ ایسے میں بھارتیہ کسان یونین کے لیڈر راکیش ٹکیت سے بار بار یہ سوال پوچھا جا رہا ہے کہ وہ اپنی پارٹی بنائیں گے۔ ان تمام سوالات کے تعلق سے انہوں نے نیوز 18 یوپی اتراکھنڈ سے بات کی۔ اس کے ساتھ ہی انہوں نے اویسی اور بی جے پی پر بھی طنز کیا۔
اس انٹرویو کے دوران راکیش ٹکیت سے پوچھا گیا کہ کیا آپ الیکشن بھی لڑیں گے؟ اس کے جواب میں انہوں نے کہا کہ ہمیں ابھی تک کوئی اندازہ نہیں ہے۔ ہمارا ایک ہی مقصد ہے کہ جو بھی الیکشن جیتے، وہ کام کرے۔ جو الیکشن جیتے گا وہ اپنا آدمی ہوگا۔ اپنی بات کو آگے بڑھاتے ہوئے ٹکیت نے کہا کہ افغانستان سے آکر یہاں کوئی الیکشن نہیں لڑرہا ہے۔
ٹکیت نے کہا کہ چاہے کوئی اقتدار میں ہو یا اپوزیشن میں… وہ سب سے رابطے میں رہتے ہیں۔ اس کے ساتھ انہوں نے یہ بھی کہا کہ تحریک کی وجہ سے جن لوگوں کو ہماری وجہ سے تکلیف پہنچی ہم ان سے معذرت خواہ ہیں۔ اس انٹرویو کے دوران ٹکیتسے ریپڈ سوالات پوچھے گئے۔ جب ان سے گرنام سنگھ کے بارے میں پوچھا گیا تو انہوں نے کہا کہ وہ ہماری تحریک کا حصہ تھے۔
جب ان سے اے آئی ایم آئی ایم کے سربراہ اسد الدین اویسی کے بارے میں سوال پوچھا گیا تو انہوں نے کہا کہ وہ بی جے پی کے چچاجان ہیں۔ یہ دونوں دن کے وقت الگ الگ اسکولوں میں پڑھتے ہیں لیکن رات کو ایک ساتھ ٹیوشن کرتے ہیں۔ ایس پی سربراہ اکھلیش یادو پر ٹکیت نے کہا – سب لوگ ٹھیک ہیں۔ جب اکھلیش کے ساتھ الیکشن لڑنے پر سوال کیاگیا تو انہوںنے کہاکہ مجھے ان کی طرف سے پیشکش ہوئی ہے، اس کے لیے آپ کا شکریہ۔
وزیر اعظم نریندر مودی اور اتر پردیش کے وزیر اعلیٰ یوگی آدتیہ ناتھ کے بارے میں انہوں نے کہا کہ یہ دونوں رہنما بھی ٹھیک ہیں۔ جو بھی لیڈر اپنے عہدے پر رہتے ہوئے کام کرے گا وہ ٹھیک ہے۔ ٹکیت نے مزید کہا – اس حکومت میں ہمارے کہنے پر بہت سے کام ہوئے ہیں، لیکن پی ایم نریندر مودی دوسروں کے کہنے پر کام کرتے ہیں۔ وہ اپنی پارٹی کے لوگوں کی بھی نہیں سنتے۔
