لکھنؤ:(ایجنسی)
اتر پردیش میں عام آدمی پارٹی نے اروند کیجریوال کی مہاریلی کے ذریعے انتخابی بگل بجا دیا ہے۔ اتوار کو لکھنؤ میں منعقدہ ’آپ‘ ریلی میں دہلی کے وزیر اعلیٰ اور پارٹی کے قومی کنوینر اروند کیجریوال نے بی جے پی پر شدید حملہ بولا اور اعلانات کی جھڑی لگا دی۔ سی ایم کیجریوال نے طنزیہ انداز میں کہا کہ یوپی میں بی جے پی کے سب سے بڑے لیڈر نے آکر کہا تھاکہ اگر یوپی میں قبرستان بنتے ہیں تو شمشان گھاٹ بھی بننے چاہئے۔ پرانی حکومت نے صرف قبرستان بنوائے اور یوگی سرکارنے صرف شمشان گھاٹ بنوائے۔ ہمیں موقع ملنے پر آپ کے بچوںکے لیے اسکول اور سب کے لیے اسپتال بنوائے جائیں گے۔
اسمرتی اپوان میدان میں ریلی سے خطاب کرتے ہوئے کیجریوال نے طنزیہ انداز میں کہا، ’’گزشتہ 5 سالوں میں یوگی حکومت نے نہ صرف شمشان گھاٹ بنائے، بلکہ بڑی تعداد میں لوگوں کو وہاں لے جانے کا کام بھی کیا۔ یہ الزام لگاتے ہوئے کہ کورونا کے دور میں جس طرح یوپی کے کووڈ مینجمنٹ کو لے کر پوری دنیا کی فضیحت ہوئی، اس پر پردہ ڈالنے کے لیے امریکہ کی سب سے بڑی میگزین میں یوگی سرکار نے 10-10 پیچ کے اشتہارات دینےپڑے۔ ان اشتہارات پر ریاست کی سرکار نے کروڑوں روپے پھونک دیے۔
یوپی میں اسکول کیوں نہیں بہتر ہو سکتے؟
کیجریوال نے اپنی تقریر میں مزید کہا کہ تعلیم کے حوالے سے 70 سال بعد بھی ہم بابا صاحب امبیڈکر کے خواب کو پورا نہیں کر سکے، جس میں انہوں نے سب کو تعلیم دینے کی بات کی تھی۔ لیکن اگر میری ساری زندگی اس کے خواب کو پورا کرنے میں لگ جائے تب بھی میں یہ کام کرتا رہوں گا۔ ’آپ‘ لیڈر نے کہا کہ تمام پارٹیوں نے جان بوجھ کر لوگوں کو ناخواندہ اور غریب رکھا۔ اگر ہم 5 سال میں دہلی کے سرکاری اسکولوں کو ٹھیک کر دیے تو کیا یوپی میں ایسے نہیں ہو سکتے تھے؟ لیکن اب ہم یہ کام مکمل کریں گے۔
کیجریوال نے کہا کہ 24 گھنٹے مفت بجلی فراہم کرنا آسان کام نہیں ہے۔ یہ ایک معجزہ کی طرح ہے۔ اس کام کے لیے اوپر والے نے ہمیں عنایت کی ہے۔ یہ کام صرف کیجریوال ہی کر سکتا ہے اور کوئی نہیں کر سکتا۔ ہماری حکومت کی وجہ سے دہلی میں 35 لاکھ خاندانوں کے بجلی کے بل صفر آ رہے ہیں۔
اکھلیش یادو پر طنز کیا
عام آدمی پارٹی کے رہنما اروند کیجریوال نے بھی اکھلیش یادو کے اعلان پر طنز کیا۔ انہوں نے کہا کہ آج کل کئی جماعتیں جگہ جگہ 300 یونٹ اور 200 یونٹ مفت بجلی دینے کے دعوے کر رہی ہیں لیکن یہ کوئی نہیں دے سکتا ہے۔ اس کا فارمولہ صرف اور صرف ہماری حکومت کو آتا ہے۔ بتا دیں کہ نئے سال پر اکھلیش یادو نے اعلان کیا ہے کہ 300 یونٹ تک مفت بجلی دی جائے گی، ساتھ ہی کسانوں کو آبپاشی کے لیے مفت بجلی بھی دی جائے گی۔
ایودھیا کا فری دورہ
اس جلسہ عام میں اروند کیجریوال نے یوپی کے لوگوں کو مفت بجلی اور نوکریاں دینے کے ساتھ ساتھ یاترا اسکیم کے تحت مذہبی مقامات پر بھیجنے کا اعلان کیا۔ انہوں نے کہا کہ اگر ہماری پارٹی کو یوپی میں موقع ملا تو ریاست کے ہر فرد کو مفت میں ایودھیا اور اجمیر شریف بھیجا جائے گا۔ اس کے علاوہ 18 سال سے زائد عمر کی خواتین کو ماہانہ 1000 روپے دینے کا وعدہ کیا۔
