لکھنؤ ؍کیرانہ : (ایجنسی)
ناہید حسن کا ٹکٹ ابھی کٹانہیں ہے۔ وہ اب بھی کیرانہ سے سماج وادی پارٹی کے امیدوار ہیں۔ دراصل ایس پی سربراہ اکھلیش یادو کے بیان سے ساری غلط فہمی پیدا ہوئی اور بی جے پی نے سوشل میڈیا پر اس طرح تشہیر کی کہ ناہید کا ٹکٹ ان کی بہن اقرا کو دیا گیا ہے۔
ایس پی کی امیدوار ناہید حسن گزشتہ روز ایک پرانے مقدمے میں سرینڈر کرنے عدالت گئے تھے تاہم پولیس نے انہیں احاطہ عدالت سے ہی حراست میں لے لیا اور عدالت میں داخل ہونے کی اجازت نہیں دی۔ اس پر چاروں طرف سے تنقید کی گئی۔ دراصل گزشتہ سال کے اس معاملے میں تمام ملزمان کو ضمانت مل چکی ہے۔ صرف ناہید حسن کو ضمانت نہیں ملی، اس سلسلے میں وہ عدالت گئے تھے۔ اکھلیش یادو نے آج دوپہر پریس کانفرنس کے دوران ایسا جملہ کہا، جسے ناہید کے حامیوں کے مطابق بی جے پی نے چھڑا لیا۔ جب صحافیوں نے اکھلیش سے ناہید کے بارے میں پوچھا تو اکھلیش نے کہا کہ اگر کاغذات نامزدگی داخل کرنے تک ناہید حسن کو ضمانت نہیں ملتی ہے تو ان کے خاندان کے کسی ایسے فرد کو ٹکٹ دیا جائے گا جس پر کوئی کیس نہیں ہو گا۔ الزام ہے کہ اکھلیش یادو کے اس بیان پر بی جے پی کے انتخابی سسٹم نے فوراً سوشل میڈیا پر یہ خبر پھیلا دی کہ ناہید حسن کا ٹکٹ کٹ گیا ہے اور اب ان کی جگہ ان کی بہن اقرا حسن انتخاب لڑیں گی۔ گھر والوں کو اس کا علم نہیں تھا۔ شام کو جب اقرا حسن کو اس بارے میں بتایا گیا تو انہوں نے فوری طور پر سوشل میڈیا پر اس کی تردید کر دی۔
لندن سے تعلیم حاصل کرنے والی اقرا منور حسن نے سوشل میڈیا پر کہا کہ میری آپ سب سے اپیل ہے کہ گودی میڈیا پر کچھ خبریں چل رہی ہیں کہ بھائی کا ٹکٹ کٹ گیا ہے۔ میں اس کی سختی سے تردید کرتی ہوں اور یہ بالکل غلط ہے۔ اکھلیش یادو جی اور پوری سماج وادی پارٹی ہمارے ساتھ ہے۔ بھائی امیدوار ہوں گے اور جلد آپ کے درمیان ہوں گے۔ آپ سب سے دعاؤں کی درخواست ہے۔ میں صرف اپنے بھائی کے لیے مہم چلا رہی ہوں۔ بھائی ناہید حسن کیرانہ اسمبلی سے واحد امیدوار ہیں اور رہیں گے۔ یہ حکومت جانے والی ہے، جھوٹ زیادہ دن نہیں چلتا۔
ناہید حسن کے حامیوں کا الزام ہے کہ بی جے پی کے انتخابی نظام نے آج جس طرح ناہید حسن اور ایس پی کے خلاف سوشل میڈیا پر مہم چلائی ہے اس سے وہ اپنی مایوسی کا اظہار کر رہے ہیں۔ بی جے پی اور آر ایس ایس کے تمام نفرت انگیز پروپیگنڈے کے باوجود کیرانہ کے لوگ ناہید حسن کے ساتھ کھڑے ہیں۔ اس وجہ سے بی جے پی بوکھلائی ہوئی ہے۔ اس دوران ایس پی نے سوشل میڈیا پر اقرا حسن کے ساتھ کسان لیڈر راکیش ٹکیت کی کئی تصاویر جاری کی ہیں، جن میں راکیش ٹکیت اقرا حسن کو آشیرواد دے رہے ہیں۔
