لکھنؤ :(ایجنسی)
پارٹی سربراہ اکھلیش یادو نے وزیر اعظم نریندر مودی پر ایک انتخابی ریلی میں ایس پی کے نشان سائیکل کو دہشت گردی سے جوڑنے پر جوابی حملہ کیا ہے۔ مودی نے ایک انتخابی ریلی میں کہا تھا کہ گجرات میں بم دھماکوں میں سائیکلوں پر بم رکھے گئے تھے۔ مودی نے کہا تھا کہ وہ حیران ہیں کہ دہشت گرد سائیکل کو کیوں پسند کرتے ہیں۔
مودی گجرات کے احمد آباد میں 2008 میں ہوئے بم دھماکوں کے بارے میں بات کر رہے تھے جن میں حال ہی میں 49 لوگوں کو قصوروار ٹھہرایا گیا ہے اور 38 لوگوں کو پھانسی کی سزا سنائی گئی ہے۔
مودی کے اس بیان پر اکھلیش یادو نے ٹوئٹ کیا ہے اور کہا ہے کہ سائیکل کی توہین پورے ملک کی توہین ہے۔ اکھلیش نے کہا ہے کہ کھیت اور کسان کو جوڑکر اس کی خوشحالی کی بنیاد رکھتی ہے، ہماری سائیکل، سائیکل عام لوگوں کا طیارہ ہے اور دیہی ہندوستان کا فخر ہے۔
اتر پردیش انتخابات میں ووٹنگ کے چار مراحل باقی ہیں۔ یہ صاف نظر آرہا ہے کہ بی جے پی اور ایس پی کے درمیان لفظوں کی جنگ اپنے عروج پر ہے اور یہ 7 مارچ یعنی ووٹنگ کے آخری مرحلے تک پورے زوروں پر رہے گی۔
اتر پردیش کے انتخابات میں بی جے پی نے اب وزیر اعظم نریندر مودی کی تابڑ توڑ ریلیاں کرنی شروع کر دی ہیں۔ اس سے آنے والے دنوں میں انتخاب کے اور زوردار ہونے سے انکار نہیں کیاجاسکتا ۔
