رائےبریلی :(ایجنسی)
وزیر اعلیٰ یوگی آدتیہ ناتھ نے پیر کو اپوزیشن پارٹیوں پر جم کر برسے۔ انہوں نے کہا کہ عطر والے دوستوںکے پاس جانےوالے پیسوں سے ہم غریبوں کو راشن اور بجلی دے رہے ہیں۔ ایس پی، بی ایس پی اورکانگریس کی حکومتوں میں عید، بقرعید پر ہی بجلی رہتی تھی۔ ہولی – دیوالی پر بجلی نہیں رہتی تھی۔ ایک دہشت گرد کے ابا جان سماج وادی پارٹی کے انتخابی پرچارک بنا دیے گئے، جو اعظم گڑھ میں تشہیر کررہے ہیں ۔ ایس پی سربراہ خاموش ہیں۔ انہوںنے عوام کی جانب اشارہ کرتے ہوئے کہاکہ آپ سب کو بیلٹ ٹرین چاہئے یا پھر پنکچر سائیکل۔ انہوں نے کانگریس کو راون کی فوج قرار دیا۔ وہ سیرین اسمبلی حلقہ سے بی جے پی امیدوار دھیریندر پرتاپ سنگھ اور ہرچند پور اسمبلی حلقہ سے بی جے پی امیدوار راکیش سنگھ کی حمایت میں انتخابی مہم کے آخری دن ایک انتخابی میٹنگ سے خطاب کررہے تھے۔
لال گنج قصبہ کے بیسوارہ انٹر کالج میں سی ایم نے کہا کہ بی جے پی جو کہتی ہے وہی کرتی ہے۔ انہوں نے ایودھیا میں عظیم الشان رام مندر بنانے کا وعدہ کیا تھا، اسے پورا کیا۔ طنز کرتے ہوئے انہوں نے پوچھا کہ کیا دہلی کے بھائی بہن اورسیفئی والے چچا بھتیجے اوربہن جی مندر بنوا سکتے تھے۔ پیسہ پہلے عطر والوں دوستوں کے گھر جاتا تھا، لیکن اب وہ انہیں پیسوں سے لوگوں کو راشن مل رہاہے ۔ ترقیاتی کام ہورہے ہیں ۔ وزیر اعلیٰ نے کہاکہ 10مارچ کےبعد دو کروڑ نوجوانوں کو اسمارٹ فون اور ٹیبلٹ دینے جارہے ہیں ۔ انہوںنے کہاکہ 2017 سے پہلے ریاست میں بڑے پیمانے پر فسادات ہو تے تھے ۔ ایس پی سرکار کے وقت 700 سے زیادہ فسادات ہوئے۔ بی ایس پی دور حکومت میں 364 فسادات ہوئے۔ مہینوں کرفیو لگا رہتا تھا ۔ تجارتی ادارے بند رہتے تھے۔ 2017 کےبعد ریاست میں کوئی فساد نہیں ہوا۔ کوئی فسادی فساد کرنے کی غلطی نہیں پائے گا،کیونکہ انہیں معلوم ہے کہ فساد کریں گے تو ان کی آنے والی کئی نسل فساد کی تلافی کرتے کرتے تھک جائیں گی اور چوراہے پر پوسٹر بھی لگائے جائیں گے۔
انہوں نے کہا کہ پہلے بیٹیاں اسکول نہیں جا سکتی تھیں، خواتین بازار نہیں جاتی تھیں۔ لیکن بی جے پی کی حکومت آنے پر سیکورٹی دی گئی ہے۔ انہوں نے کہا کہ دہشت گردوں کے خلاف درج مقدمات واپس لینے کا کام ایس پی حکومت میں ہوا۔ گجرات کی عدالت نے 30 دہشت گردوں کو موت کی سزا سنائی ہے، جبکہ 11 کو عمر قید کا سامنا ہے۔ ان میں سے آٹھ دہشت گردوں کا تعلق اتر پردیش سے ہے۔ ایک دہشت گرد کے ابا جان سماج وادی پارٹی کے ایک پرچارک ہیں، جو اعظم گڑھ میں انتخابی مہم چلا رہے ہیں۔ ایس پی سے پوچھا جائے کہ ان کے لیے ملک کی سلامتی ہمارے لیے اہم ہے۔ قوم کی قیمت پر سیاست نہیں کی جا سکتی۔
