گروگرام :(آر کے بیورو)
آل انڈیا یونانی طبی کانگریس ہریانہ کی جنرل باڈی میٹنگ و دعوت تشکر کا اہتمام ڈاکٹر قمرالدین ذاکر کے ذریعہ ان کی رہائش گاہ پر کیا گیا ۔اس میٹنگ میں ڈاکٹر قمرالدین ذاکر صدر اےآئی یو ٹی سی ہریانہ کو ہریانہ سرکار کے ذریعہ دئے گئے ایوارڈ کی خوشی میں ڈاکٹر سید احمد خان نیشنل جنرل سیکریٹری آل انڈیا یونانی طبی کانگریس نئی دہلی کی جانب سے ان کی خدمت میں مومنٹو پیش کیا گیا ۔
دہلی سے آئے وفد میں حکیم عطاء الرحمن اجملی منیجنگ ڈائیریکٹر اے اینڈ ایس فارمیسی و دہلی اقلیتی کمیشن کے مسلم ایڈوائزر کمیٹی کے ممبر اور ڈاکٹر احمد رانا منیجنگ ڈائیریکٹر زیتون ہربل فارمیسی نے بطور مہمان ذی وقار شرکت کی ۔
ڈاکٹر قمرالدین ذاکر نے اردو اکیڈمی و ہریانہ سرکار کا شکریہ ادا کیا اور سبھی اردو داں طبقہ سے گزارش کی کہ وہ اپنی صلاحیتوں کو لکھت میں قلمبند کریں۔ڈاکٹر سید احمد خان نے سبھی ممبران سے کہا کہ وہ طب یونانی کی فلاح و بہبود اور اس کے پرچار پرسار کے لئے سخت محنت کریں ۔ڈاکٹر محمد ارشد غیاث جنرل سیکریٹری اےآی یو ٹی سی ہریانہ نے تنظیم کی توسیع کے مقصد سے سبھی کے سامنے کچھ یونانی ڈاکٹروں کے نام پیش کئے، جن کو نیشنل جنرل سیکریٹری وصدر محترم کی اجازت سےمنظور کر لیا گیا ۔
ڈاکٹر عبدالسلام شکراوہ کوصدر میڈیکل آفیسرس ونگ ،ڈاکٹر زبیر احمدکوجنرل سیکریٹری میڈیکل آفیسرس ونگ نامزد کیا گیا ۔ ڈاکٹر محی الدین اورڈاکٹر عبدالسلام جلال پور کو سینئر نائب صدور کی ذمہ داریاں سونپی گئیں۔
اس کے علاوہ ڈاکٹر اسلم علی، ڈاکٹر محمد قاسم، ڈاکٹر حمید اللہ، ڈاکٹر عبدالغفار،مبین احمد، محمدعاقل اور دیگر حضرات نے شرکت کی ۔نظامت کے فرائض ماسٹر اشرف میواتی نے بخوبی انجام دئے۔
