احمد آباد :(ایجنسی)
بی جے پی کی حکومت والی ریاست گجرات میں بجرنگ دل نے اعلان کیا ہے کہ وہ ایک کرکٹ ٹورنامنٹ منعقد کرے گا جس میں صرف ہندو کھلاڑی ہی کھیل سکیں گے۔ بجرنگ دل کے رہنماؤں کا کہنا ہے کہ مئی میں یہ کرکٹ ٹورنامنٹ گجرات کے کئی شہروں میں منعقد کیا جائے گا۔
انڈین ایکسپریس کے مطابق بجرنگ دل کے لیڈر جولت مہتا نے کہا کہ ان کی تنظیم احمد آباد اور وہاں کے دیگر شہروں کی مقامی کرکٹ ٹیموں کے ساتھ رابطے میں ہے اور ٹورنامنٹ میں حصہ لینے والی ٹیموں کے سامنے صرف ایک شرط رکھی گئی ہے کہ تمام کھلاڑی ہندو ہوں گے۔
بجرنگ دل نے گزشتہ دو دہائیوں میں گجرات میں سب سے بڑی رکنیت مہم بھی چلائی ہے اور سابر کانٹھا میں 2600 نوجوانوں کو ترشول دکشا دی گئی ہے۔
دریں اثنا، وشو ہندو پریشد نے منگل کو احمد آباد میں ایک سنت سمیلن کا انعقاد کیا اور ہندو مندروں اور دیگر مذہبی اداروں سے حکومتی کنٹرول کو ہٹانے، گئوشالوں کے لیے ٹیکس میں ریلیف، ذات پات کی تفریق کو ختم کرنے سمیت کئی اہم امور پر تبادلہ خیال کیا۔
یقیناً بجرنگ دل کی جانب سے اس طرح کے کرکٹ ٹورنامنٹ کے انعقاد کا اعلان کسی بھی آئینی ملک میں بالکل غلط ہے۔ اس سے مذہبی تفریق اور لوگوں کے درمیان فاصلے بڑھیں گے۔ گزشتہ چند مہینوں میں، بجرنگ دل نے بہت سی ریاستوں میں تبدیلی مذہب کا الزام لگا کر کافی ہنگامہ کھڑا کر دیا ہے۔ گزشتہ سال کرسمس کی تقریبات کے دوران بھی بجرنگ دل کے کارکن کئی جگہوں پر پہنچے تھے اور نعرے لگائے تھے۔
اسمبلی انتخابات قریب ہیں
اب گجرات میں اسمبلی انتخابات میں صرف 8 ماہ باقی رہ گئے ہیں اور 5 میں سے 4 ریاستوں میں بڑی جیت حاصل کرنے کے بعد بی جے پی کے جوش و خروش عروج پر ہے۔ وزیر اعظم نریندر مودی نے کچھ دن پہلے گجرات میں 9 کلومیٹر طویل روڈ شو بھی کیا ہے۔ گجرات میں اس بار کانگریس کے علاوہ عام آدمی پارٹی بھی مضبوطی سے لڑ رہی ہے۔ گجرات میں بی جے پی دو دہائیوں سے زیادہ عرصے سے اقتدار میں ہے اور نریندر مودی خود 14 سال سے گجرات کے وزیر اعلیٰ رہے ہیں۔
