راج بھر کے بی جے پی میں جانے کی افواہیں گرم

لکھنؤ :(ایجنسی)

انتخابی نتائج کے بعد بھی اتر پردیش کی سیاست میں ہلچل ہے۔ اسمبلی انتخابات میں زبردست کامیابی کے بعد بھارتیہ جنتا پارٹی (بی جے پی) کی قیادت میں حکمران اتحاد مسلسل دوسری بار حکومت بنانے کی تیاری کر رہا ہے، وہیں دوسری طرف اپوزیشن کے سامنے اپنا کنبہ بچانے کاچیلنج بھی نظر آرہاہے ۔ سہیل دیو بھارتیہ سماج پارٹی (ایس بی ایس پی) کے بی جے پی کی قیادت والے اتحاد میں شامل ہونے کی خبروں نے ریاست کا سیاسی درجہ حرارت بڑھا دیا ہے۔

اوم پرکاش راج بھر نے خود اب ان کی پارٹی ایس بی ایس پی کے بی جے پی کی قیادت والے اتحاد میں شامل ہونے کی خبروں پر بیان دیا ہے۔ اوم پرکاش راج بھر نے ایسی خبروں کو بے بنیاد قرار دیتے ہوئے کہا ہے کہ ہم سماج وادی پارٹی کے ساتھ ہیں۔ انہوں نے کہا ہے کہ ہم نے بلدیاتی انتخابات کی تیاری شروع کر دی ہے۔ ہر اسمبلی کے انتخابی نتائج کا جائزہ لیا جا رہا ہے۔ اب ہم 2024 کی تیاری کر رہے ہیں۔

بی جے پی لیڈروں سے ملاقات پر او پی راج بھر کا بیان

بی جے پی لیڈروں سے ملاقات کی خبر پر انہوں نے کہا کہ میں 2019 سے پہلے بی جے پی کے بڑے لیڈروں سے ملا تھا۔ آخری بار وہ دہلی تبھی گئے جب انہیں استعفیٰ دینا پڑا۔ اوم پرکاش راج بھر نے کہا کہ میری پارٹی کے کسی بھی لیڈر نے مجھے نہیں بلایا کیونکہ وہ مانتے ہیں کہ جو بھی لڑ رہا ہے، وہ ان کے لیے لڑ رہا ہے۔

راج بھر نے کہا کہ ایک وقت تھا جب رام مندر کا مسئلہ حل ہو جائے گا، یہ کوئی نہیں سوچ رہا تھا۔ کانگریس کے ایک لیڈر نے بھی بہت پہلے طلاق ثلاثہ کے معاملے پر قانون بنانے کا مطالبہ کیا تھا۔ ہمیں یقین ہے کہ آج نہیں تو کل، یوگی جی یا اکھلیش یادو یا مایاوتی، کوئی نہ کوئی سماجی انصاف کمیٹی کی رپورٹ کو نافذ کرے گا۔

بی جے پی نے مطالبہ تسلیم نہیں کیا

اوم پرکاش راج بھر نے کہا کہ بی جے پی نے سماجی انصاف کمیٹی کی رپورٹ کو پانچ سال تک لاگو کرنے کا مطالبہ نہیں مانا۔ پہلے وہ اس رپورٹ کو نافذ کریں۔ انہوں نے قومی سطح پر بڑا اتحاد بنانے کی تیاریوں کا ذکر کرتے ہوئے کہا کہ لیڈر جو بھی ہوگا ہم سب ساتھ ہوں گے۔ سب مل بیٹھ کر اس محاذ کا قائد طے کریں گے اور 2024 کا الیکشن ان کی قیادت میں لڑا جائے گا۔

وزیر بنائے جانے کی قیاس آرائیاں ہو رہی تھیں

اوم پرکاش راج بھر کی جانب سے یہ وضاحت ایک ایسے وقت میں آئی ہے جب ان کی پارٹی کے بی جے پی کی قیادت والے اتحاد کے ساتھ جانے کی خبریں تھیں۔ اہم بات یہ ہے کہ خبریں آئی تھیں کہ اوم پرکاش راج بھر نے امت شاہ، دھرمیندر پردھان اور سنیل بنسل سے ملاقات کی ہے۔ راج بھر کے بارے میں یہ بھی کہا جا رہا تھا کہ انہیں یوگی سرکار 2.0 میں وزیر بھی بنایا جا سکتا ہے۔

تاہم، نہ تو اوم پرکاش راج بھر اور نہ ہی بی جے پی نے ایسی خبروں کی تصدیق کی ہے۔ راج بھر کے بی جے پی میں شامل ہونے کی خبر سے ایس پی خیمہمیں بے چینی بڑھ گئی ہے۔ اب اوم پرکاش راج بھر نے خود سامنے آکر ایس بی ایس پی کے بی جے پی کے ساتھ جانے کی قیاس آرائیوں کو ختم کردیا ہے۔