بھوپال :(ایجنسی)
دی کشمیر فائلز فلم کے بارے میں آواز اٹھانے والے آئی اے ایس افسر نیاز خان کی مشکلات بڑھ سکتی ہیں۔ وزیر داخلہ نروتم مشرا نے کہا کہ ریاستی حکومت نیاز کو نوٹس جاری کرے گی اور جواب طلب کرے گی۔ نیاز خان نے دی کشمیر فائلز کے حوالے سے سوشل میڈیا پر تبصرہ کیا تھا۔ اس پر بی جے پی لیڈروں اور وزراء نے ناراضگی ظاہر کی ہے۔
دراصل نیاز خان نے سوشل میڈیا پر کہا تھا کہ کشمیر فائلز فلم کے بعد ان واقعات پر بھی فلم بننی چاہیے جن میں مسلمانوں کا قتل ہوا ہے۔ اس کی وجہ سے ریاست کے وزراء اور کچھ بی جے پی لیڈر نیاز سے ناراض ہیں۔ اس سے قبل طبی تعلیم کے وزیر وشواس سارنگ نے نیاز کے بیانات پر اعتراض اٹھایا تھا۔ اب وزیر داخلہ نروتم مشرا نے کہا کہ نیاز خان حد سے گزر رہے ہیں۔ اہلکاروں کی اپنی لکشمن ریکھا ہے اور نیاز اس کی خلاف ورزی کر رہے ہیں۔ ریاستی حکومت نیاز کو نوٹس جاری کرکے جواب طلب کرے گی۔ اس سے قبل بی جے پی ایم ایل اے رامیشور شرما نے بھی نیاز خان کے خلاف کارروائی کا مطالبہ کیا تھا۔
نیاز خاں نے اتوار کو سوشل میڈیا پر کہا تھا کہ کشمیر فائلز نے 150 کروڑ روپے کمائے ہیں۔ پروڈیوسر وویک اگنی ہوتری کو یہ رقم کشمیری پنڈتوں کی فلاح و بہبود پر خرچ کرنی چاہیے۔ وہ خود کشمیر میں پنڈتوں کے لیے کام کرنا چاہتے ہیں۔ تاہم، وویک اگنی ہوتری نے خان کو کتابوں سے ملنے والی رائلٹی پر سوال اٹھایا۔ دونوں کی 25 مارچ کو بھوپال میں ملاقات ہونے کا امکان ہے۔
