نئی دہلی :(ایجنسی)
راشٹریہ سویم سیوک سنگھ (آر ایس ایس) سے منسلک مسلم راشٹریہ منچ اپریل میں رمضان کے مقدس مہینے میں ملک بھر میں افطار پارٹی کا اہتمام کرے گا۔ ملک بھر میں منعقد ہونے والی افطار پارٹی میں سنگھ کی مرکزی ٹیمیں بھی شامل ہوں گی۔ مسلم راشٹریہ منچ کے بانی اندریش کمار آر ایس ایس کی مرکزی ٹیموں سے درخواست کریں گے کہ وہ اپنے علاقے میں ہونے والی افطار پارٹی میں شرکت کریں۔
رمضان کے بعد سنگھ سے وابستہ تنظیم ملک بھر میں عید ملن کا پروگرام بھی منعقد کرے گی۔ یہ تنظیم امن اور ہم آہنگی کے پیغام کو پھیلانے کے لیے سماج کے مختلف طبقوں کے نامور لوگوں اور سنگھ کے رہنماؤں کو عید ملن میں شرکت کے لیے مدعو کرے گی۔
پی ٹی آئی کے مطابق، ایم آر ایم کا ہر کارکن ملک بھر میں رمضان کے مقدس مہینے میں کم از کم ایک دن افطار کی میزبانی کرے گا ۔ ایم آر ایم کے بانی اور چیف سرپرست اندریش کمار کی صدارت میں ہفتہ کو منعقدہ میٹنگ میں یہ فیصلہ کیا گیا۔ یہ بات تنظیم کے ترجمان شاہد سعید نے بتائی۔
رمضان کے بعد منعقد ہو گئی عید ملن تقریب
شاہد سعید نے کہا کہ اندریش کمار ذاتی طور پر آر ایس ایس کی مرکزی ٹیم سے درخواست کریں گے کہ وہ اپنے اپنے علاقوں میں ایم آر ایم کارکنوں کی طرف سے منعقد افطار میں شرکت کریں۔ انہوں نے مزید کہا کہ آر ایس ایس کے سینئر رہنماؤں کو بھی رمضان کے بعد تنظیم کی طرف سے منعقد کی جانے والی عید ملن کی تقریبات میں شرکت کے لیے مدعو کیا جائے گا۔ ایم آر ایم کا قیام نومبر 2002 میں آر ایس ایس کے قومی ایگزیکٹیو ممبر اندریش کمار نے کیا تھا جس کا مقصد مسلمانوں کو ملک میں ہندوؤں کے قریب لانا تھا۔
سعید نے کہا کہمیٹنگ میں کئی اہم امور پر تبادلہ خیال کیا گیا۔ ایم آر ایم کے ترجمان نے کہا کہ اس میٹنگ میں تنظیم کو مزید وسعت دینے کی ضرورت پر زور دیا گیا۔ اس کے ساتھ ہی ہندوستان اور بیرون ملک ممبر شپ مہم شروع کرنے کا فیصلہ کیا گیا۔ انہوں نے بتایا کہ اس میٹنگ میں فلم ’دی کشمیر فائلز‘ کو سراہا گیا جس نے حقیقت کو لوگوں کے سامنے لایا ہے۔
