نئی دہلی :(ایجنسی)
انتخابی پالیسی ساز پرشانت کشور کے کانگریس میں شامل ہونے کی قیاس آرائیاں جلد ہی ختم ہو سکتی ہیں۔ خبر ہے کہ وہ جلد ہی کانگریس کا حصہ بن سکتے ہیں۔ یہی نہیں کہا جا رہا ہے کہ پارٹی نے ان کے لیے ذمہ داری بھی طے کر دی ہے۔ پچھلے چند ہفتوں میں کشور نے کانگریس کے سرکردہ لیڈروں کے ساتھ بیک ٹو بیک ملاقاتیں کی ہیں۔ اس دوران 2024 کے لوک سبھا انتخابات کو لے کر بھی تبادلہ خیال ہوا ۔
این ڈی ٹی وی کی رپورٹ کے مطابق کانگریس کے ایک اعلیٰ ذرائع نے بتایا ہے کہ کشور کی کانگریس میں شامل ہونے کی کوششیں اس بار کامیابی کے دہانے پر ہیں۔ وہ جلد ہی پارٹی میں شامل ہو سکتے ہیں۔ یہ بھی بتایا گیا ہے کہ پارٹی نے ان کے لیے اہم کردار کا تقریباً طے کر لیا ہے۔ پارٹی کی سربراہ سونیا گاندھی ،راہل گاندھی کے ساتھ مشاورت کے بعد اس کردار کا خاکہ بنائیں گی۔
یہاں، کشور کی تجویز پر بات کرنے کے لیے سونیا گاندھی کی طرف سے تشکیل دی گئی ایک خصوصی ٹیم، چاہتی ہے کہ کشور پوری طرح سے کانگریس کے لیے وقف رہیں اور دوسری پارٹیوں سے تعلقات توڑ دیں۔ اس سے قبل کشور نے مغربی بنگال اسمبلی انتخابات میں حکمراں ترنمول کانگریس کے ساتھ کام کیا تھا۔
رپورٹ کے مطابق پارٹی کے بہت سے لیڈروں کا ماننا ہے کہ کشور قومی سطح پر کردار چاہتے ہیں اور کسی ایک پارٹی سے بندھنا نہیں چاہتے۔ پارٹی کے سینئر لیڈر دگ وجے سنگھ انتخابی حکمت عملی بنانے والوں کو پارٹی میں شامل کرنے اور انہیں تبدیلیاں کرنے کے مواقع دینے کے حامی ہیں۔ انہوں نے کہا تھا کہ کشور کا ’سفر ایک پارٹی سے دوسری پارٹی کا رہا ہے‘۔ لہٰذا اس قسم کی سیاسی وابستگی یا نظریہ سے وابستگی واضح نہیں تھی۔
ان کا مزید کہنا تھا کہ ‘لیکن اب وہ کچھ مضبوط تجاویز کے ساتھ سامنے آئے ہیں اور جو پریزنٹیشن انھوں نے دی ہے وہ اچھی ہے۔ کشور نے گزشتہ سال پارٹی کے سامنے پہلی پریزنٹیشن دی تھی۔ ساتھ ہی، موجودہ منصوبے کے بارے میں زیادہ معلومات سامنے نہیں آئی ہیں۔ کشور نے کانگریس کے بڑے لیڈروں کے سامنے ایک پریزنٹیشن دیا ہے۔
