نئی دہلی :(ایجنسی)
ہندی زبان کو نئی طاقت اور تقویت دینے کے لیے حکومت ہند کی جانب سے اہم اقدامات کیے جا رہے ہیں۔ اب اسی سلسلے میں حکومت ہند نے ہندی کو انٹرنیٹ میڈیا کی سرکاری زبان بنانے کا تاریخی اقدام کیا ہے۔ اس کے تحت اب سرکاری محکموں، وزارتوں اور اداروں کے ہندی ورژن کو انگریزی کے بجائے ہندی ڈومین میں چلانے کا فیصلہ کیا گیا ہے۔
اس کا مطلب ہے کہ اب ویب سائٹ کا نام انگریزی میں نہیں بلکہ ہندی میں درج کیا جائے گا اور لوگ اس زبان میں ہی URL درج کرکے ویب سائٹ کو تلاش کر سکیں گے یا دیگر سرکاری معلومات حاصل کر سکیں گے۔ اس سے ہندی بولنے والوں کو بڑی راحت ملے گی کہ جو لوگ ویب سائٹ کے انگریزی میں نام ہونے کی وجہ سے چیزوں کے بارے میں معلومات حاصل نہیں کر پا رہے تھے، وہ اب آسانی سے آن لائن تلاش کر سکیں گے اور معلومات حاصل کر سکیں گے۔
انڈیا پورٹل ویب سائٹ بنائی گئی
اس کی شروعات کے لئے’’انڈیا پورٹل‘ ویب سائٹ حکومت ہند نے تیار کی ہے۔ اسے انڈیا ، سرکار، بھارت ایڈریس سے لائیو کیا گیا ہے ۔ اسی طرح دیگر وزارتوں کی ویب سائٹس کو بھی ہندی ڈومین کے ساتھ اتارا جائے گا ۔
ای میل ایڈریس کا نام ہندی میں رکھ سکیں گے
بھاسکر کی ایک رپورٹ کے مطابق انٹرنیٹ گورننس کے ماہر ہریش چودھری نے کہا کہ اس نئی پہل کے نفاذ کے بعد لوگ ہندی میں بھی ای میل ایڈریس بنا سکیں گے۔ اس کے ساتھ ہی سرکاری اہلکار ہندی ایڈریس سے بھی ای میل بھیج سکیں گے۔ ہندی ای میل مثال کے طور پر سمجھیں تو وزارت داخلہ کے سکریٹری کا ای میل ایڈریس – سچیو @سرکار. بھارت رکھ سکیں گے ۔
ویب سائٹ فی الحال کس ڈومین پر چل رہی ہے؟
حکومت ہند کی ویب سائٹیں فی الحال gov.in پر چلتی ہیں، جو کہ ملک کا اپنا ڈومین ہے۔ وہیں دوسرے ممالک کی بات کریں تو جیسے پاکستان کاpk.، فرانس کا .fr، اٹلی کا it. اور چین کا cn.۔ com .ڈومین اس وقت پوری دنیا میں بول بالا ہے۔ اس میں تقریباً 20 کروڑ رجسٹریشن ہیں، جبکہ ہندوستان کےin .میں تقریباً 25 لاکھ رجسٹریشن ہیں۔
