نئی دہلی: (ایجنسی)
سماجوادی پارٹی کے رکن اسمبلی اور سابق وزیر اعظم خاں کی طبیعت ناساز ہو گئی، جس کے بعد انہیں ہفتہ کو دیر رات گئے دہلی کے سر گنگا رام اسپتال میں داخل کرایا گیا۔ رپورٹ کے مطابق اعظم خاں کو سانس لینے میں پریشانی کے سبب اسپتال میں داخل کرایا گیا ہے۔
اعظم خاں کے بیٹے اور سوار سیٹ سے ایس پی ایم ایل اے عبداللہ اعظم اپنے والد کو اسپتال لے کر پہنچے، جہاں ان کا علاج چل رہا ہے۔ بتایا جا رہا ہے کہ جیل سے آنے کے بعد اعظم خاں کئی بیماریوں میں مبتلا ہیں۔ داخل ہونے کے بعد اسپتال میں اعظم خاں کے کئی ٹیسٹ کئے گئے ہیں۔ سینے میں درد کے پیش نظر ای سی جی بھی کیا گیا۔
خیال رہے کہ ایس پی ایم ایل اے 27 ماہ سے سیتا پور جیل میں قید تھے۔ بی جے پی حکومت کے دوران ان کے خلاف 90 مقدمات درج کئے گئے ہیں۔ فی الحال وہ سپریم کورٹ سے عبوری ضمانت منظور ہونے کے بعد پر سیتا پور جیل سے رہا ہوئے ہیں۔
