نی دہلی (ایجنسی) بالی ووڈ اداکار عامر خان کی فلم ‘لال سنگھ چڈھا’ 11 اگست کو سینما گھروں میں ریلیز ہو چکی ہے لیکن ریلیز کے بعد بھی تنازعات کا سلسلہ تھمنے کا نام نہیں لے رہا۔ فلم کے بائیکاٹ کے بڑھتے ہوئے مطالبات اور احتجاج کے درمیان اب عامر خان کے خلاف اس فلم کے ذریعے بھارتی فوج کی توہین اور ہندوؤں کے مذہبی جذبات کو ٹھیس پہنچانے کی شکایت درج کرائی گئی ہے۔رپورٹس کے مطابق عامر خان کے خلاف جمعہ کو مقدمہ درج کیا گیا ہے۔ دہلی سے تعلق رکھنے والے وکیل ونیت جندل نے عامر خان کے خلاف مقدمہ درج کرتے ہوئے ان پر بھارتی فوج کی توہین اور مذہبی جذبات کو ٹھیس پہنچانے کا الزام لگایا ہے۔
دراصل ایڈوکیٹ ونیت جندال کا کہنا ہے کہ فلم میں بنانے والوں نے ایک ذہنی معذور شخص کو فوج میں بھرتی ہوتے اور کارگل کی جنگ میں لڑتے ہوئے دکھایا ہے۔ یہ تو سب کو معلوم ہے کہ فوج کے بہترین سپاہی کارگل کی جنگ میں لڑنے کے لیے بھیجے گئے تھے جن کی سخت ٹریننگ ہوتی ہے مگرفلم میں جان بوجھ کر فوج کی توہین کرنے کی کوشش کی گئ ہے۔عامر خان کے خلاف دفعہ 153، 153 اے، 298 اور 505 کے تحت مقدمہ درج کیا گیا ہے۔
عامر خان کے ساتھ ساتھ وکیل نے لال سنگھ چڈھا کے ڈائریکٹر ادویت چندن اور پیراماؤنٹ پکچرز پروڈکشن ہاؤس کے خلاف بھی شکایت درج کرائی ہے۔
