گوہاٹی: آل انڈیا یونائیٹڈ ڈیموکریٹک فرنٹ (اے آئی یو ڈی ایف) کے سپریمو اور لوک سبھا کے رکن بدرالدین اجمل نے چیف منسٹر ہمنتا بسوا سرما سے اپیل کی کہ مدارس کو بلڈوز کرنا بند کریں۔انہوں نے اسے سنگھ کی منصوبہ بندی بتایا۔اجمل نے وزیر اعلیٰ سے یہ درخواست اس وقت کی جب بونگائیگاؤں ضلع انتظامیہ نے بدھ کو بلڈوزر کے ذریعے جوگیگھوپا علاقے میں کبیتاری میں ایک پرائیویٹ مدرسہ مرکز المعارف کریانہ کو ڈھادیااس طرح کی کارروائی آسام کے اقلیتی اکثریتی علاقوں میں بچوں کی تعلیم پر براہ راست حملہ ہے۔
اے آئی یو ڈی ایف کے سربراہ نے میڈیا کو بتایا کہ مدارس عوامی ملکیت ہیں اور انہیں بغیر کسی پیشگی قانونی اطلاع کے منہدم نہیں کیا جا سکتا۔یہ بتاتے ہوئے کہ اتر پردیش میں یوگی آدتیہ ناتھ حکومت نے بلڈوزر کا استعمال بند کر دیا ہے، اجمل نے آسام کے وزیر اعلی سے ایسی غیر اخلاقی کارروائی کو روکنے کی اپیل کی۔آر ایس ایس پر مدارس کو بلڈوز کرنے کی منصوبہ بندی کرنے کا الزام لگاتے ہوئے، انہوں نے کہا: ’’اگر کسی شخص کو جہادی تنظیموں کے ساتھ وابستگی یا کسی بھی قسم کی ملک دشمن سرگرمیوں کے لیے گرفتار کیا جاتا ہے، تو حکومت ایسے شخص کو قانون کے تحت سزا دے ۔مدارس کبھی نفرت یا فرقہ پرستی کی تعلیم نہیں دیتے اور انہیں منہدم کرنا غیر قانونی اور غیر اخلاقی ہے۔
مدرسوں کو مسمار کرنا بچوں کو خاص طور پر مسلم بچوں کو تعلیم سے محروم کرنا ہے۔واضح ہو 126رکنی اسمبلی میں اے یو ڈی ایف کے15ارکان ہیں بونگائیگاؤں انتظامیہ نے ڈسٹرکٹ ڈیزاسٹر منیجمنٹ اتھارٹی کے "تشخیص” کا حوالہ دیتے ہوئے کہا کہ مرکز المعارف کریانہ مدرسہ "غیر محفوظ تھا اور مناسب دستاویزات کے بغیر کئی سرگرمیوں کے لیے استعمال کیا جا رہا تھا”، اور یہ کہ اس نے مکینوں کومدرسہ خالی کرنے کے لیے 24 گھنٹے سےکم وقت دیا.
