لکھنؤ : پی ایف آئی (پیپلز فرنٹ آف انڈیا) کے حوالے سے یوپی اور دیگر مقامات پر کریک ڈاؤن اورگرفتاریوں کا سلسلہ ہفتہ کو بھی جاری رہا۔ خاص بات یہ ہے کہ سنیچر کو گرفتار ہونے والوں میں کئی مقامی علماء بھی شامل ہیں۔ قومی سلامتی ایجنسی این آئی اے جمعہ سے پی ایف آئی کے خلاف کریک ڈاؤن کر رہی ہے۔ اسے آپریشن آکٹوپس کا نام دیا گیا۔ ستیہ ڈاٹ کام کے مطابق ہفتہ کو یو پی کے انسداد دہشت گردی دستہ (اے ٹی ایس) نے شاملی، غازی آباد اور مظفر نگر اور میرٹھ سے چار لوگوں کو گرفتار کیا۔ افسران نے دعویٰ کیا کہ ان کے پاس سے غزوہ ہند سے متعلق لٹریچر بھی ملا ہے۔ دعوی میں کہاگیا ہے کہ ملزموں کے قبضے سے برآمد ہونے والی پین ڈرائیوز میں آئی ایس اور کشمیری عسکریت پسندوں سے متعلق ویڈیوز ملے ہیں۔
یوپی اے ٹی ایس ذرائع کے مطابق ملزمان کی شناخت شاداب عزیز قاسمی، مفتی شہزادہ، مولانا ساجد اور مولانا اسلام قاسمی کے طور پر کی گئی ہے۔
یہ الزام لگایا جاتا ہے کہ گرفتار ملزمان کا مقصد 2047 تک شریعت نافذ کرنا تھا اور اس کا اثر سی اے اے اور این آر سی مخالف مظاہروں میں دیکھا گیا۔ ملزمان نے اے ٹی ایس حکام کو بتایا کہ انہوں نے کیرالہ میں پی ایف آئی کیمپوں کا دورہ کیا اور وہاں جوڈو، کراٹے اور ہتھیاروں کی تربیت لی۔
ملزم کے خلاف سیکشن 120B، 121A، 153A، 295A، 109، 505(2) IMD اور غیر قانونی سرگرمیاں (روک تھام) ایکٹ کی دفعہ 13(1)(b) کے تحت کھرکھوڈہ، میرٹھ میں مقدمہ درج کیا گیا ہے۔
ایک ملزم محمد شاداب عزیز قاسمی ایس ڈی پی آئی کے مغربی اترپردیش ونگ کے جنرل سکریٹری تھے۔ یوپی اے ٹی ایس نے سات دستاویز فائلیں، 11 ویڈیوز، پین ڈرائیوز سے 179 اشتعال انگیز تصاویر اور اسلامک اسٹیٹ (آئی ایس) سے متعلق لٹریچر برآمد کرنے کا بھی دعویٰ کیا ہے۔
دریں اثنا، 15 ریاستوں میں پھیلے پاپولر فرنٹ آف انڈیا کے ارکان کے خلاف اب تک کی سب سے بڑی کارروائی کا کوڈ نام "آپریشن آکٹوپس” تھا۔
22 ستمبر کو، 11 ریاستوں میں NIA، ED اور متعلقہ ریاستوں کی پولیس کی مشترکہ ٹیم نے چھاپے مار کر PFI کے 106 سے زیادہ اراکین کو گرفتار کیا تھا۔ این آئی اے کی قیادت میں تمام ٹیموں نے جمعرات کو پی ایف آئی کے 106 عہدیداروں کو گرفتار کیا تھا۔ ملک میں دہشت گردانہ سرگرمیوں کی حمایت کرنے کے الزام میں 15 ریاستوں میں 93 مقامات پر تحقیقات جاری ہیں۔
