سائیکل چھوڑ کر عمران مسعود ہاتھی پر سوار

لکھنؤ : پہلے ہاتھ کاساتھ پھر سائیکل پر بھروسہ اوراب ہاتھی کی سواری کرکے مغربی اترپردیش کے تیزطرارلیڈر عمران مسعود نے موقع شناس ہونے کا ثبوت دیا ہے ۔ بی ایس پی سربراہ مایاوتی نے بدھ کو سماج وادی پارٹی چھوڑنے والے عمران مسعود کے سر پر ہاتھ رکھا اور انہیں بی ایس پی کی رکنیت دلائی۔ عمران کو بڑی ذمہ داری دیتے ہوئے انہیں مغربی یوپی میں بی ایس پی کا کنوینر بھی بنایا گیا ہے۔ عمران مسعود، اس سال کانگریس چھوڑ کر سماج وادی پارٹی میں شامل ہو گئےتھے ٹکٹ نہ ملنے پر وہ ایس پی سے ناراض تھے۔ بی ایس پی میں شامل ہونے کے بعد عمران نے کہا کہ وہ بہن جی کی تحریک کو مضبوط کرنے آئے ہیں۔ انہوں نے کہا کہ جب بھی بی ایس پی کی تحریک کمزور ہوئی ہے، بی جے پی مضبوط ہوئی ہے۔ اس کے برعکس جب ایس پی مضبوط ہوئی ہے تو بی جے پی بھی مضبوط ہوئی ہے۔
مایاوتی نے بھی ٹویٹ کرکے مسعود کے بی ایس پی میں شامل ہونے کی اطلاع دی۔ مایاوتی نے لکھا کہ عمران مسعود اتر پردیش اور خاص طور پر مغربی یوپی کی سیاست میں ایک جانا پہچانا نام ہے۔ جنہوں نے آج اپنے قریبی ساتھیوں کے ساتھ مجھ سے ملاقات کی وہ سماج وادی پارٹی چھوڑ کر بی ایس پی میں شامل ہوئے، نیک نیتی اور پوری طاقت کے ساتھ کام کرنے کے وعدے کے ساتھ ان کا پرتپاک استقبال۔