وڈودرا :گجرات کے وڈودرا میں پیر کو پٹاخے پھوڑنے پر دو گروپوں کے درمیان خونریز تصادم ہوا۔ معمولی تکرار سے شروع ہونے والے اس جھگڑے میں فریقین نے ایک دوسرے پر پتھراؤ شروع کر دیا۔ کچھ ہی دیر میں حالات اتنے خراب ہو گئے کہ ہجوم نے دکانوں اور گاڑیوں کو آگ لگانا شروع کر دی۔ کہا جا رہا ہے کہ اس دوران ایک طرف سے لوگوں نے پٹرول بموں سے حملہ بھی کیا۔
یہ واقعہ وڈودرا کے پانیگھاٹ علاقے میں مسلم اسپتال کے قریب پیش آیا۔ اطلاع ملتے ہی پولیس موقع پر پہنچ گئی اور علاقے میں بڑی تعداد میں پولیس فورس تعینات کردی۔Tv9 بھارت ورش آن لائن نے یہ خبر دی ہے خبر کے مطابق ملزموں کی شناخت کے لیے سی سی ٹی وی کیمروں کو اسکین کیا جا رہا ہے۔پولیس نے واقعہ کی تفصیلات سے آگاہ کرتے ہوئے بتایا کہ پیر کو کچھ لوگ مسلم ہسپتال کے قریب آتش بازی کر رہے تھے۔ اس دوران جب دوسری طرف کے
لوگوں نے اعتراض کیا تو ان کے درمیان ہاتھا پائی ہو گئی۔Tv9 بھارت ورش کے مطابق بتایا جا رہا ہے کہ اس کے بعد دونوں طرف کے لوگوں نے اپنی اپنی کمیونٹی کے لوگوں کو بلایا اور پھر ان کے درمیان لڑائی اور پتھراؤ شروع ہو گیا۔ اس واقعہ میں ایک درجن کے قریب لوگ زخمی بھی ہوئے ہیں۔ تاہم پولیس نے ابھی تک زخمیوں کی تصدیق نہیں کی ہے۔
پولیس ے دعویٰ کیا کہ اس واقعے کے دوران پیٹرول بموں سے حملے بھی ہوئے۔ اس کے ساتھ ہی ہجوم نے کئی دکانوں اور گاڑیوں کو آگ لگا دی ۔ فائر بریگیڈ کی ٹیم نے رات بھر مہم چلا کر آگ پر قابو پایا اور امدادی کام کیا۔پولیس حکام کے مطابق تمام ملزمان کو جلد گرفتار کر لیا جائے گا۔ اس کے لیے پولیس کی مختلف ٹیمیں تشکیل دی گئی ہیں۔ یہ تمام ٹیمیں مشتبہ جگہوں پر چھاپے مار رہی ہیں۔
