ایم سی ڈی الیکشن میں بھی پاکستان کی ‘انٹری’ ہوگئ۔

نئی دہلی: ملک کی راجدھانی دہلی کے ایم سی ڈی الیکشن میں اب پاکستان کی بھی انٹری ہو گئی ہے۔ دہلی کے وزیر ستیندر جین کی ویڈیو کے بعد اب بی جے پی نے عام آدمی پارٹی کو نشانہ بنانے کے لیے اپنی پرانی ترکیب کا استعمال کیا ہے۔ بی جے پی کے سینئر لیڈر کیلاش وجے ورگیہ نے کہا کہ ’’کانگریس کی خوشامد اور جھاڑو کی کچرا پالیسی کی وجہ سے یہاں کے چھوٹے چھوٹے وارڈ پاکستان بن گئے ہیں لیکن ہمیں ان سے ڈرنا نہیں ہے!‘‘
کیلاش وجے ورگیہ نے کہا کہ ہم متحد ہو کر پاکستان کو تباہ کریں گے اور وہاں ترنگا گاڑیں گے۔ وجے ورگیہ نے کہا کہ دہلی کے ووٹروں کو یہ احساس دلانا چاہیے کہ ہم ان چھوٹے پاکستانوں سے ڈرنے والے نہیں ہیں۔ وجے ورگیہ نے مزید کہا، ’’دہلی میں ٹکڑے کر دئے، ادے پور میں گردن کاٹ دی، ہمت ہے تو یوپی میں کر کے دکھائیں، ان کی سات نسلیں یاد دلا دیں گے۔‘‘ خیال رہے کہ بی جے پی لیڈر کیلاش وجے ورگیہنے دہلی کی شری رام کالونی میں انتخابی مہم کے دوران یہ کہا
قابل ذکر ہے کہ 24 نومبر کو بی جے پی لیڈر کیلاش وجے ورگیہ نے دہلی کے سی ایم اروند کیجریوال کے لیے ’چھاڑو چھاپ‘ اور ’چونی چھاپ‘ جیسے الفاظ کا استعمال کیا تھا۔
یاد رہے کہ 4 دسمبر کو ہونے والے ایم سی ڈی انتخابات میں بی جے پی، کانگریس اور عام آدمی پارٹی کے درمیان سہ رخی مقابلہ نظر آ رہا ہے۔ دہلی کے وزیر اعلیٰ اروند کیجریوال نے ایم سی ڈی میں 250 سیٹیں جیتنے کا دعویٰ کیا ہے۔ دوسری طرف ایم سی ڈی پر گزشتہ 15 سال سے حکومت کرنے والی بی جے پی نے بھی دوبارہ جیت کا دعویٰ کیا ہے، جبکہ کانگریس پارٹی نے بھی اپنی تشہیر میں پوری طاقت چھونک دی ہے۔ ایم سی ڈی انتخابات کے نتائج 7 دسمبر کو جاری کئے جائیں گے