امریکہ نے عراق پر چڑھائی کے لیے جھوٹے ثبوت فراہم کیے تھے: سابق فرانسیسی وزیر دفاع کا دعویٰ

دبئ:فرانس کی سابق خاتون وزیر دفاع مائیکل ایلیٹ میری نے پولیٹیکل میموری پروگرام جس کی اقساط بعد میں ’العربیہ‘ پرنشر کی جائیں گی میں انکشاف کیا ہے عراق پر امریکا کی فوج کشی غلط اورجعلی ثبوتوں کی بنیاد پر کی گئی تھی۔
العربیہ نیوز کے مطابق ان کا کہنا تھا کہ پیرس نے اس وقت امریکی قیادت کی طرف سے عراق پر حملے کے لیے پیش کردہ جواز مسترد کر دیے تھے۔ امریکا نے عراق میں گندم کے گوداموں کی تصاویر کو میزائل ڈپو بنا کرپیش کیا تھا اور ہم جانتے تھے کہ یہ گندم کے گودام ہیں۔
انہوں نے کہا کہ 2002ء میں ان کے امریکی ہم منصب ڈونلڈ رمز فیلڈ نے یورپی وزرائے دفاع کے ساتھ ملاقات میں امریکی سیٹلائٹ سے لی گئی تصاویر پر روشنی ڈالی۔ اس میں انہوں نے ایک عراقی شہری سہولت کی جگہ کو دکھایا تھا اور دعویٰ کیا تھا کہ یہ جگہ میزائل داغنے کے پلیٹ فارم کے طور پر استعمال کی جاتی ہے۔ دوسری طرف فرانسیسی وزیر دفاع نے اسی جگہ کی لی گئی تصاویر دکھائیں، جس سے ظاہر ہوتا ہے کہ وہ گندم کے گودام تھے۔
فرانس کی سابق وزیر دفاع نے اس بات کی تصدیق کی کہ 2003 میں عراق کے خلاف جنگ شروع کرنے کا جواز پیش کرنے کے لیے امریکا کی جانب سے عوامی طور پر پیش کی گئی دستاویزات بڑی حد تک غلط حقائق پر مبنی تھیں۔
مائیکل ایلیٹ میری نے کہا کہ میں یہ نہیں کہنا چاہتی کہ امریکا کی طرف سے پیش کیے گئے تمام ثبوت غلط ہیں لیکن جو کچھ بھی امریکا نے عوامی سطح پر پیش کیا وہ بڑی حد تک غلط حقائق پر مبنی تھا اور میرا ماننا ہے کہ کولن پاول نے جب میں ان سے ملی تو انہوں نے بھی [عراق پر چڑھائی کے جعلی ثبوتوں کا اعتراف کیا تھا۔
میں نے بھی فرانس کا موقف سمجھانے کے لیے امریکا کا سفر کیا تھا اور یہ ہمیشہ آسان نہیں تھا لیکن اس کے باوجود میں وہاں گیا۔ میں نے محسوس کیا کہ کولن پاول مکمل طور پر متفق نہیں تھے۔ انہوں نے بش کے موقف کو نہیں اپنایا جب میں ان سے ملا۔
انہوں نے کہا کہ میں اس وقت کونڈولیزا رائس سے بھی ملی تھی اور ان سے کہا تھا: دیکھو جو تم کر رہی ہو وہ غلط ہے۔ عراق ایک تکثیری ملک ہے، یہ درست ہے کہ اس کا مقام اہم ہے، لیکن اس میں مختلف مقامات ہیں۔ ہم ایک غیر مستحکم خطہ پیدا کرنے کا خطرہ کیسے مول لے سکتے ہیں۔ میں بعد میں کونڈولیزا رائس سے ملی، اس نے مجھ سے کہا کہ آپ غلط نہیں تھیں۔