نئی دہلی کے جنتر منتر پر مبینہ ‘دھرم سنسد’ کے دوران مسلمانوں اور عیسائیوں کے خلاف ہندو سادھو کی نسل کشی پر مبنی تقریر کو کور کرنے پر دہلی پولیس نے آن لائن میڈیا مولٹکس کو نوٹس بھیجا ہے۔
ڈی سی پی کےنوٹس میں کہا گیا "یہ دیکھا گیا ہے کہ آپ سوشل میڈیا کا استعمال قابل اعتراض، بدنیتی پر مبنی اور اشتعال انگیز پوسٹس کرنے کے لیے کر رہے ہیں۔ نئی دہلی ضلع کا سائبر پولیس اسٹیشن، نئی دہلی ضلع میں سائبر کرائمز کی نوڈل ایجنسی دہلی پولیس نے آپ کے خلاف سیکشن 149 سی آر پی سی کے تحت قابل اعتراض، بدنیتی پر مبنی اور اشتعال انگیز پیغامات پوسٹ کرنے پر مقدمہ درج کیا ہے۔
نوٹس میں مزید کہا گیا، "آپ کو اس کے ذریعے وضاحت کرنے کی ہدایت کی جاتی ہے کہ ایسا کرنے سےگریز کریں بصورت دیگر آپ قانون کی متعلقہ دفعات کے تحت سخت تعزیری کارروائی کے لیے ذمہ دار ہوں گے۔”
قومی دارالحکومت دہلی کے جنتر منتر پر اتوار کو ایک ‘دھرم سنسد’ نے ہندو قوم کے قیام کے لیے مسلمانوں اور عیسائیوں کے قتل پر زور دیا۔
دراصلMolitics کی طرف سے شیئر کی گئی ویڈیو میں ہری سنگھ کی تقریر دکھائی گئی۔ہیٹ اسپیچ اور واقعہ کے خلاف ابھی تک پولیس نے کوئی کارروائی نہیں کی ہے۔ سپریم کورٹ کی سخت ہدایات کے باوجود ملک بھر میں ہندوتوا لیڈروں کی نفرت انگیز تقاریر کا سلسلہ نہیں رکا ہے۔
یہ ‘دھرم سنسد’مدھیہ پردیش میں باگیشور دھام مندر کے 26 سالہ ہیڈ پجاری دھیریندر کرشنا شاستری، جو باگیشور دھام سرکار کے نام سے مشہور ہیں، اور نفرت پھیلانے والے سدرشن ٹی وی کے سربراہ سریش چوہانکے کی حمایت میں منعقد کی گئی تھی۔
