فیک نیوز پھیلانے پر دینک بھاسکر کے ایڈیٹر،اور بی جے پی لیڈر پر ایف آئی آر

تمل ناڈو میں تارکین وطن مزدوروں پر حملے کے الزامات کو لے کر اسٹالن حکومت ایکٹو موڈ میں آگئی ہے۔ تمل ناڈو حکومت کی ہدایت کے مطابق، پولیس نے تین لوگوں کے خلاف مقدمہ درج کیا ہے۔ جس میں ایک بی جے پی لیڈر اور دینک بھاسکر کے ایڈیٹر سمیت دو صحافیوں کے خلاف تمل ناڈو پولیس نے تمل ناڈو میں شمالی ہندوستانی کارکنوں پر حملوں کے بارے میں جھوٹی اور بے بنیاد خبروں پر مقدمہ درج کیا ہے۔ دوسری طرف، ہفتہ کے روز، بہار حکومت نے تارکین وطن پر حملوں کے الزامات کی تحقیقات کے لیے جمعہ (4 مارچ) کو جائزہ کے لیے سینئر حکام کی ایک ٹیم تمل ناڈو بھیجی ہے۔
جن ستہ کے مطابق جن لوگوں پر مقدمہ درج کیا گیا ہے۔ ان میں بی جے پی کے ترجمان پرشانت امراؤ بھی شامل ہیں، جو گوا حکومت کے لیے سپریم کورٹ میں مستقل وکیل کے طور پر بھی کام کرتے ہیں۔ دینک بھاسکر کے ایڈیٹر کے علاوہ محمد تنویر نامی صحافی پر بھی ایف آئی آر ہوئی ہے ایک اعلیٰ پولیس افسر نے بتایا کہ ان کی گرفتاری کے لیے تین الگ الگ ٹیمیں تشکیل دی گئی ہیں۔ تمل ناڈو حکومت کی طرف سے ہفتہ کو جاری کردہ ایک بیان میں کہا گیا ہے کہ تمل ناڈو میں تمام شمالی ہندوستانی کارکن ریاست میں امن سے رہ رہے ہیں۔
امراؤ جن کے ٹوئٹر پر فالوورز کی بڑی تعداد ہے۔ تمل ناڈو کے سی ایم اسٹالن اور بہار کے ڈپٹی سی ایم تیجسوی یادو کی تصویر شیئر کرتے ہوئے انہوں نے لکھا کہ ہندی بولنے پر بہار کے 12 کارکنوں کو تمل ناڈو میں پھانسی دی گئی۔ تاہم پولیس نے اس دعوے کو افواہ قرار دیا۔
تینوں کے خلاف مختلف گروپوں کے درمیان دشمنی اور بدامنی کو فروغ دینے سے متعلق جرائم کے لیے آئی پی سی کی دفعات کے تحت مقدمہ درج کیا گیا ہے۔