سنگھ کی دو ٹوک،ہماری طرف سے پہل نہیں،مسلمان چاہیں تو ہم ملنے کو تیار

چنڈی گڑھ: راشٹریہ سویم سیوک سنگھ نے منگل کو کہا کہ اس کا مسلم دانشوروں تک پہنچنے کا کوئی پروگرام نہیں ہے، لیکن اگر دوسری طرف سے کوئی پہل ہوتی ہے تو وہ ملنے کے لیے تیار ہے۔
انڈین ایکسپریس (INDANEXPRES) کی رپورٹ کے مطابق پانی پت کے قریب سمالکھا میں راشٹریہ سویم سیوک سنگھ کی اعلیٰ ترین فیصلہ ساز تنظیم اکھل بھارتیہ پرتیندھی سبھا کی تین روزہ میٹنگ کے بعد میڈیا سے بات کرتے ہوئے اس کے جنرل سکریٹری دتاتریہ ہوسابلے نے کہا، "آر ایس ایس کے رہنما مسلم دانشوروں کے ساتھ مل کر کام کر رہے ہیں۔ ان کی دعوت پر مذہبی رہنماؤں سے ملاقاتیں ہوئی ہیں۔پہل اسی طرف سے ہے، سنگھ کی طرف سے کوئی رابطہ نہیں ہے۔”
یاد رہے کہ گزشتہ سال آر ایس ایس کے سربراہ موہن بھاگوت نے راجیہ سبھا کے سابق رکن پارلیمنٹ شاہد صدیقی، سابق الیکشن کمشنر ایس وائی قریشی، لیفٹیننٹ جنرل (ریٹائرڈ) ضمیر الدین اور دہلی کے سابق لیفٹیننٹ گورنر نجیب جنگ سے ملاقات کی تھی۔ اس سال جنوری میں آر ایس ایس لیڈر کرشنا گوپال نے کچھ مسلم لیڈروں سے ملاقات کی۔
پچھلے سال ستمبر میں، بھاگوت نے دہلی میں ایک مسجد اور ایک مدرسے کا بھی دورہ کیا تھا اور آل انڈیا مسلم امامس آرگنائزیشن کے رہنما کے ساتھ بات چیت کی تھی – جسے اقلیتی برادری تک سنگھ کی رسائی کے حصے کے طور پر دیکھا جاتا ہے۔