چھتیس گڑھ:نکسلیوں کے آئی ڈی حملہ میں 10جوان شہید

دنتے واڑہ (چھتیس گڑھ): چھتیس گڑھ کے دنتے واڑہ میں بدھ کو ماؤنوازوں نے سیکورٹی فورسز پر بڑا دہشت گردانہ حملہ کیا۔ نکسلیوں کی طرف سے نصب آئی ای ڈی میں دھماکہ ہونے کی وجہ سے 10 فوجی جوان شہید ہو گئے۔ ایک ڈرائیور کی موت کی بھی خبر ہے۔ معلومات کے مطابق، آرن پور تھانہ علاقے میں ماؤنواز کیڈر کی موجودگی کی اطلاع پر نکسل مخالف آپریشن کے لیے دنتے واڑہ سے ڈی آر جی فورس بھیجی گئی تھی۔ مہم کے بعد واپس آتے ہوئے، ماؤنوازوں نے آرن پور روڈ پر آئی ای ڈی کا دھماکہ کیا۔ تصاویر اور ویڈیوز سے حملے کی سنگینی کا اندازہ لگایا جاسکتا ہے کہ نکسلیوں نے کتنی بے دردی سے فوجیوں کو نشانہ بنایا۔ جس گاڑی میں فوجی اس علاقے میں گئے تھے اسے اڑا دیا گیا۔ شہید فوجیوں کی لاشیں بھی بکھری ہوئی دیکھی گئیں۔ جس جگہ ماؤنوازوں نے حملہ کیا وہاں ایک بڑا گڑھا بن گیا ہےپولیس حکام کا کہنا ہے کہ واقعے کی اطلاع ملتے ہی اضافی نفری موقع پر بھیج دی گئی ہے۔ قابل ذکر ہے کہ حالیہ دنوں میں سیکورٹی فورسز کی طرف سے نکسلیوں کے خلاف مسلسل کارروائی کی جا رہی تھی۔ نکسلیوں کی طرف سے بھی مسلسل گھات لگا کر حملے کئے جا رہے ہیں۔ پچھلے مہینے، بیجاپور میں سی اے ایف کا ایک جوان ماؤنوازوں کی طرف سے لگائے گئے پریشر آئی ای ڈی کی زد میں آکر شہید ہو گیا تھا۔
اس سے پہلے 9 مارچ کو چھتیس گڑھ کے سکما میں سیکورٹی فورسز اور نکسلیوں کے درمیان تصادم ہوا تھا۔ مقابلے کے بعد بھاری مقدار میں دھماکہ خیز مواد اور بیرل گرینیڈ لانچر برآمد کیا گیاتھا