ہمارے فون نمبر ٹریک کیے جارہے ہیں:پہلوان بجرنگ پونیا کا دعویٰ

جنتر منتر پر ریسلنگ فیڈریشن آف انڈیا کے صدر برج بھوشن شرن سنگھ کے خلاف احتجاج کرنے والے پہلوان بازو پر سیاہ پٹیاں باندھے ہوئے نظر آئے۔ پہلوانوں نے 11 مئی کو یوم سیاہ قرار دیا۔ بجرنگ پونیا نے الزام لگایا ہے کہ ان کے فون نمبرز کو ٹریک کیا جا رہا ہے۔
خبر رساں ایجنسی پی ٹی آئی کے مطابق پہلوان بجرنگ پونیا، ونیش پھوگٹ، ساکشی ملک کے ساتھ ساتھ ستیہ ورت کدیان اور جتیندر نے ماتھے پر سیاہ پٹیاں باندھ رکھی تھیں، جب کہ کچھ حامیوں نے اسے بازوؤں پر باندھ کر برج بھوشن سنگھ کے خلاف بے کوئی کارروائی نہ کیے جانے پر احتجاج کیا تھا۔ پہلوان برج بھوشن کی گرفتاری کا مطالبہ کر رہے ہیں، جن پر انہوں نے ایک نابالغ سمیت کئی خواتین پہلوانوں کے جنسی استحصال کا الزام لگایا ہے۔
بجرنگ پونیا نے کہا، “آج ہم برج بھوشن شرن سنگھ کے خلاف احتجاج میں یوم سیاہ منا رہے ہیں۔ ہمیں اپنی جیت کا یقین ہے کیونکہ پورا ملک ہماری لڑائی میں ہمارے ساتھ ہے۔ ہر روز ہمارا احتجاج زور پکڑ رہا ہے اور جب تک ہمیں انصاف نہیں مل جاتا ہم لڑتے رہیں گے۔
صحافیوں سے بات کرتے ہوئے انہوں نے مزید کہا کہ آج کل ہمارے فون نمبرز کو ٹریک کیا جا رہا ہے۔ ہمارے ساتھ ایسا سلوک کیا جا رہا ہے کہ ایسا لگتا ہے جیسے ہم نے کوئی جرم کیا ہے۔ میں آپ کو بتا رہا ہوں کہ جو بھی ہمارے ساتھ رابطے میں ہے اس کا سراغ لگایا جا رہا ہے۔