اللہ خیر،اے ایم یو کے سابق وی سی طارق منصور بی جے پی کے قومی نائب صدر بھی بنا دئے گئے

نئی دہلی:سیاسی حلقوں میں کہا جارہا ہے کہ اے ایم یو کے سابق وی سی طارق منصور کو وی سی رہتے ،وفاداری ،نبھانےپر انعام کی دوسری قسط مل گئی ہے -وہ بی جے پی کے لئے نرم گوشہ رکھنے کے لئے مشہور تھے-
خبر کے مطابق بھارتیہ جنتا پارٹی نے کچھ نئے مرکزی عہدیداروں کا اعلان کر دیا ہے۔ اس اعلان کے ساتھ ہی پارٹی نے قومی نائب صدور، قومی جنرل سکریٹریز، نیشنل کو آرگنائزیشن جنرل سکریٹریز، قومی سکریٹری اور خزانچی کے ناموں کا اعلان کیا ہے۔ بی جے پی صدر جے پی نڈا کے ذریعہ جاری کردہ مرکزی عہدیداروں کی فہرست میں 13 قومی نائب صدور اور 8 قومی جنرل سکریٹری ہیں۔ بی جے پی نے 13 میں سے دو مسلم لیڈروں کو قومی نائب صدر بنایا ہے۔ علی گڑھ مسلم یونیورسٹی کے سابق وائس چانسلر طارق منصور اور کیرالہ کے عبداللہ کٹی کو بی جے پی کا نیا قومی نائب صدر مقرر کیا گیا ہے۔ اس فہرست میں پارٹی کے نئے 13 قومی سکریٹریوں کے نام بھی ہیں۔ بی جے پی کے 13 قومی نائب صدروں میں سے تین کا تعلق چھتیس گڑھ سے ہے۔ چھتیس گڑھ کے سابق وزیر اعلی رمن سنگھ کو بھی بی جے پی کا قومی نائب صدر قرار دیا گیا ہے۔ ان کے علاوہ چھتیس گڑھ کے ایم پی سروج پانڈے اور لتا اسےندی کو بھی بی جے پی نے قومی نائب صدر کا درجہ دیا ہے۔ راجستھان کی سابق وزیر اعلیٰ وسندھرا راجے کو بھی مرکزی تنظیم میں ذمہ داری دیتے ہوئے قومی نائب صدر بنایا گیا۔
اتر پردیش سے طارق منصور کے علاوہ ممبران پارلیمنٹ لکشمی کانت باجپائی اور ریکھا ورما کو قومی نائب صدر بنایا گیا ہے۔ جھارکھنڈ کے سابق وزیراعلیٰ رگھوبر داس بھی بی جے پی کے نئے قومی نائب صدر بن گئے ہیں۔ اڈیشہ سے بائیجیانت پانڈا اور ناگالینڈ کے ایم چوبا اے او کو بھی قومی نائب صدر بنایا گیا ہے۔