یوپی:انتہائی شرمناک،چوری کے شبہ میں دو نابالغوں کو پیشاب پلایا،پرائیوٹ پارٹ میں مرچیں ڈالیں

سدھارتھ نگر: بی جے پی کے زیر اقتدار ریاست اترپردیش کے سدھارتھ نگر ضلع میں انسانیت کوشرمسار کردینے والا واقعہ سامنے آیا ہے ،جہاں چوری کے شبہ میں دو نابالغ لڑکوں کو نہ صرف مبینہ طور پر پیشاب پلایا گیا، بلکہ ہری مرچیں ان کے پرائیویٹ پارٹس پر لگائی گئیں اور انہیں زبردستی کچھ نامعلوم انجکشن لگائے گئے۔ متاثرین کی عمریں 10 اور 15 سال ہیں۔ اس دل دہلا دینے والے واقعے کی ویڈیو بھی منظر عام پر آئی ہے جس کو دکھایا نہیں جاسکتا این ڈی ٹی وی کی خبر کے مطابق متاثرہ لڑکوں کو ہری مرچ کھاتے اور بوتل میں بھر کر پیشاب کرتے ہوئے دکھایا گیا ہے۔ مردوں کے ایک گروہ کو ان کے ساتھ بدسلوکی کرتے ہوئے اور ایسا نہ کرنے کی صورت میں انہیں مارنے کی دھمکی دیتے ہوئے سنا جا سکتا ہے۔
رپورٹ کے مطابق غنڈوں نے مبینہ طور پر لڑکوں کو پکڑ کر باندھ دیا اور ان پر رقم چوری کرنے کا الزام لگایا۔ ایک اور ویڈیو میں لڑکوں کو زمین پر منہ کے بل لیٹے دیکھا جا سکتا ہے، ان کے ہاتھ کمر کے پیچھے بندھے ہوئے ہیں اور پتلون نیچے کھینچی ہوئی ہے، جب کہ ایک شخص ہری مرچیں رگڑ کر ان کی شرمگاہ میں ڈال رہا ہے۔ درد سے چیخ و پکار کرنے والے لڑکوں کو بھی پیلے کوئی انجکشن لگایا جاتا ہے۔
یہ ویڈیو 4 اگست کا بتایا جا رہا ہےویڈیو ضلع کے پاتھرا بازار تھانہ علاقے کے کونکاٹی چوراہے کے قریب کا ہے۔
پولیس نے کہا کہ انہوں نے سوشل میڈیا پر وائرل ہونے والے "دو بچوں کے خلاف قابل اعتراض فعل” کی ویڈیو کا فوری نوٹس لیا اور قانون کی متعلقہ دفعات کے تحت مقدمہ درج کیا۔ ضلع کے ایڈیشنل سپرنٹنڈنٹ آف پولیس سدھارتھ نے کہا، "حملے میں ملوث لوگوں کی شناخت کر لی گئی ہے اور ان میں سے چھ کو حراست میں لے لیا گیا ہے”۔