تریپورہ کے راستے روہنگیا مسلمان دیگر ریاستوں میں داخل ہورہے ہیں:سی ایم تریپورہ کا دعویٰ

تریپورہ کے وزیر اعلی مانک ساہا نے پولیس کو حکم دیا ہے کہ وہ تریپورہ کے راستے روہنگیا مسلمانوں کے داخلے کو روکنے کے لیے سخت اقدامات کرے۔ انہوں نے کہا کہ روہنگیا تریپورہ کے راستے داخل ہو کر دوسری ریاستوں میں جا رہے ہیں جسے روکنا بہت ضروری ہے۔ ریاست کے لاء اینڈ آرڈر سے متعلق جائزہ میٹنگ میں وزیر اعلیٰ نے پولس افسران سے کہا کہ وہ اسے کسی بھی طرح سے روکیں۔ سی ایم ساہا نے کہا کہ اس میٹنگ کا مقصد ریاست کو مافیا سے پاک کرنا ہے اور اس کے لیے کیا اقدامات کیے جانے چاہئیں اس پر تبادلہ خیال کرنا ہے۔ انہوں نے یہ بھی کہا کہ جرائم کے خلاف زیرو ٹالرنس کی پالیسی کے علاوہ ریاست کے تھانوں کو بھی جدید ٹیکنالوجی سے لیس کیا جانا چاہیے۔
اے بی پی نیوز کے مطابق سی ایم ساہا نے کہا، روہنگیا تریپورہ کے راستے ملک کے باقی حصوں میں پھیل رہے ہیں۔چیف منسٹر نے دعویٰ کیا کہ روہنگیا مسلمان تریپورہ کو راہداری کے طور پر استعمال کررہے ہیں اور اس کے ذریعے ملک کے باقی حصوں میں پھیل رہے ہیں۔ وزیر اعلیٰ نے کہا کہ انکوٹی ضلع میں انہوں نے دیکھا کہ بنگلہ دیش کی سرحد پر تار کی باڑ سیلاب کی وجہ سے ندی کے پانی کے بہاؤ سے تباہ ہو گئی ہے۔ اس کے ذریعے نہ صرف غیر قانونی امیگریشن ہو رہی ہے بلکہ جانوروں کی سمگلنگ بھی ہو رہی ہے۔