دہلی فساد:تین مسلم ملزمان بری،عدالت نے پولیس کے طریقہ تفتیش پر اٹھائے سوال

نئی دہلی:دہلی کی کڑکڑڈوما عدالت نے جمعہ 18 اگست کو ایک اہم فیصلہ سناتے ہوئے 2020 دہلی فسادات کیس میں 3 ملزمان عقیل احمد،رئیس خان اور ارشاد کو بری کر دیا ہے۔ اس کے ساتھ ہی عدالت نے سخت ریمارکس دیتے ہوئے دہلی پولیس پر سوال اٹھاتے ہوئے کہا کہ چارج شیٹ پہلے سے طے شدہ طریقے سے داخل کی گئی ،اس کے لیے دہلی پولیس کو کٹہرے میں کھڑا کیا گیا
ملزمان کے خلاف کئی دفعات میں چارج شیٹ داخل کی گئی ان میں تعزیرات ہند کی دفعہ 147 (فساد)، 148 (مہلک ہتھیار سے فساد)، 149 (کسی مشترکہ چیز کے ساتھ غیر قانونی اجتماع)، 120 بی (مجرمانہ سازش)، 188 (عوامی نافرمانی)، 436 (فائرنگ) شامل ہیں۔
دی کوئنٹ کے مطابق عدالت نے اپنے حکم میں کہا کہ
"یہاں یہ بات قابل ذکر ہے کہ رہائی کا یہ حکم اس احساس کی وجہ سے پاس کیا جا رہا ہے کہ رپورٹ ہونے والے واقعات کی صحیح اور اچھی طرح سے تفتیش نہیں کی گئی تھی اور چارج شیٹ پہلے سے سوچے سمجھے، من گھڑت اور غلط طریقے سے تیار کی گئی تھی۔ کارروائی صرف ابتدائی غلطیوں کو چھپانے کے لیے کی گئی ہے۔کیس میں کی گئی تحقیقات کا جائزہ لینے اور اس کی بنیاد پر کارروائی کے لیے کیس کو محکمہ پولیس کو واپس بھیج دیا گیا
دی کوئنٹ نے آگے اپنی رپورٹ میں بتایا استغاثہ کے مطابق، 2020 کے فسادات کے دوران، ایک ہجوم نے شمال مشرقی دہلی میں وکٹوریہ پبلک اسکول کے آس پاس توڑ پھوڑ کی اور کئی گاڑیوں کو آگ لگا دی۔ پولیس نے کہا کہ یہ ملزمان اس بھیڑ میں شامل تھے۔ ہجوم مبینہ طور پر پتھر، سلاخیں اور لاٹھیاں اٹھائے ہوئے تھا۔ علاقے میں سڑکیں بھی بلاک کر دی گئیں۔
عدالت نے اس معاملے میں شکایت کنندگان کے بیانات کو متضاد پایا اور کہا کہ تفتیشی افسر (IO) نے اس حقیقت کو نظر انداز کیا کہ بھیڑ NRC/CAA کے حق میں اور خلاف نعرے لگا رہی تھی۔
عدالت نے کہا "اس حقیقت کو سمجھنا بہت ضروری ہے کہ دونوں ہجوم مختلف اور ایک دوسرے کے خلاف تھے۔ تفتیشی افسران اس سوال پر خاموش رہے کہ کس واقعہ کو کس ہجوم نے انجام دیا۔
جسٹس پرماچل نے مزید مشاہدہ کیا، "اگر وکٹوریہ پبلک اسکول اور اس کے آس پاس فسادی ہجوم کے ہاتھوں کئی واقعات ہوئے ہیں، تو تفتیشی افسر کا فرض تھا کہ وہ اس طرح کے ہر واقعے کے دوران ایسے ہجوم کی ساخت کا پتہ لگائے۔ کسی غیر قانونی ہجوم کا رکن اس شخص کی غیر موجودگی میں اس ہجوم کی طرف سے کی گئی کسی بھی چیز کا ذمہ دار نہیں ٹھہرایا جا سکتا۔
ملزمان پر مبینہ واقعات میں ملوث ہونے کا شبہ کرنے کے بجائے، عدالت نے شبہ ظاہر کیا کہ آئی او نے رپورٹ شدہ واقعات کی صحیح تفتیش کیے بغیر، شواہد میں ہیرا پھیری کی۔
اس معاملے میں وکیل شبانہ اور محمد حسن ملزمین کی طرف سے پیش ہوئے، جب کہ ریاست کی طرف سے خصوصی سرکاری وکیل مدھوکر پانڈے پیش ہوئے۔