غزہ میں بمباری سے اب تک 32 مساجد شہید

اسرائیل اور حماس کے درمیان جنگ کا آج 18 واں دن ہے۔ الجزیرہ کے مطابق پیر کو غزہ میں اسرائیلی حملوں میں ہلاک ہونے والوں کی تعداد 5,087 تک پہنچ گئی۔ غزہ میں گزشتہ 24 گھنٹوں کے دوران تقریباً 436 افراد جان کی بازی ہار چکے ہیں۔ پیر کو اسرائیل نے الشطی پناہ گزین کیمپ پر حملہ کیا۔ اس میں کئی خواتین اور بچے ہلاک ہو گئے۔ حماس نے اسرائیلی فوج کے دو ٹھکانوں پر ڈرون سے حملہ کیا ہے۔ اسی دوران اسرائیلی فوج نے غزہ کی ایک اور مسجد پر حملہ کیا ہے۔ اب تک یہاں 32 مساجد کو تباہ کیا جا چکا ہے۔ اسی دوران پہلی مرتبہ غزہ میں چھاپے کے لیے داخل ہونے والے اسرائیلی فوجیوں کی حماس کے جنگجوؤں سے جھڑپ ہوئی ہے۔ حماس نے ان فوجیوں پر ٹینک شکن میزائل داغے جو مغوی اسرائیلیوں کی تلاش کے لیے داخل ہوئے۔
اس دوران ایک اسرائیلی فوجی مارا گیا۔ حماس نے دعویٰ کیا ہے کہ غزہ کی پٹی میں داخل ہونے والے اسرائیلی فوجی اپنے ٹینک اور دیگر فوجی گاڑیاں چھوڑ کر واپس بھاگ گئے۔اقوام متحدہ نے کہا ہے کہ غزہ میں چاروں طرف سے ہو رہی بمباری کے درمیان لوگوں نے دوبارہ شمالی غزہ کی طرف لوٹنا شروع کر دیا ہے۔ وہ اسرائیل کی طرف سے ان انتباہات سے خوفزدہ نہیں ہیں۔ دراصل اسرائیل نے کہا تھا کہ شمالی غزہ خالی نہ کرنے والوں کو بھی دہشت گرد تصور کیا جائے گا۔