امریکہ نے شام میں ایرانی فوجی ٹھکانوں پر حملے کئے

امریکہ کا کہنا ہے کہ اس نے مشرقی شام میں دو اہداف پر حملہ کیا ہے۔
امریکہ کا دعویٰ ہے کہ اسے ایرانی فوجی دستے اور اس سے وابستہ گروپ استعمال کر رہے تھے۔
ایک بیان میں، امریکی وزیر دفاع لائیڈ آسٹن نے کہا کہ یہ حملے عراق اور شام میں امریکی افواج کے تحفظ کے لیے اور ایرانی حمایت یافتہ ملیشیا گروپوں کے حالیہ حملوں کے جواب میں "اپنے دفاع” میں کیے گئے۔
انہوں نے کہا کہ امریکی فوج پر ایرانی حمایت یافتہ حملوں کو برداشت نہیں کیا جائے گا اور انہیں روکنا ہوگا۔ ایران اس حقیقت کو چھپانا چاہتا ہے کہ ان حملوں کے پیچھے اس کا ہاتھ ہے اور ہماری افواج کے خلاف ان حملوں میں اپنے کردار سے انکار کرتا ہے۔ ہم ایسا نہیں ہونے دیں گے۔‘‘
آسٹن نے کہا کہ امریکی حملے "اسرائیل اور حماس کے درمیان جاری تنازعہ سے الگ ہیں۔”
اس سے قبل وائٹ ہاؤس کی قومی سلامتی کونسل کے ترجمان جان کربی نے پریس بریفنگ میں بتایا تھا کہ ’انہیں براہ راست پیغام بھیجا گیا ہے۔
پینٹاگون کے مطابق گزشتہ ایک ہفتے کے دوران عراق میں کم از کم 12 اور شام میں چار بار امریکی فوجیوں پر حملے کیے گئے ہیں۔