غزہ کو دو حصوں میں بانٹنے کا دعوی،امریکہ نے ایٹمی آبدوز تعینات کی

اسرائیلی فوج نے اتوار کو رات گئے غزہ میں بڑے پیمانے پر فضائی حملے کیے اور زمینی دستوں نے غزہ شہر کا محاصرہ مکمل کرتے ہوئے غزہ کو دو حصوں میں تقسیم کر دیا۔ پورے غزہ کی پٹی میں انٹرنیٹ اور دیگر ٹیلی کمیونیکیشن سروسز کو درہم برہم کر دیا گیا ہے۔
پیر کو اسرائیل اور حماس کی جنگ کا 31 واں دن ہے۔ 7 اکتوبر سے غزہ پر اسرائیلی حملوں میں کم از کم 9770 فلسطینی ہلاک ہو چکے ہیں۔ اسرائیل پر حماس کے حملے میں 1400 سے زائد افراد مارے گئے تھے۔
ٹائمز آف اسرائیل کے مطابق، IDF کے ترجمان ریئر ایڈمرل ڈینیل ہگاری نے شام کی ایک پریس کانفرنس کے دوران کہا کہ فوج زمین پر حماس کے بنیادی ڈھانچے کے خلاف بڑے پیمانے پر حملے کر رہی ہے۔ غزہ پر حکمرانی کرنے والے حماس گروپ کے ایک اہلکار نے بتایا کہ "ہسپتالوں کے ارد گرد ایک گھنٹے سے زائد عرصے سے شدید بمباری جاری ہے۔”
حماس کے سرکاری میڈیا آفس کے سربراہ سلامہ معروف کے مطابق حملے خاص طور پر غزہ کے سب سے بڑے ہسپتال الشفا کے ارد گرد بہت زیادہ ہیں۔ اسرائیل کا کہنا ہے کہ یہ ہسپتال دہشت گرد گروپ کی کارروائیوں کا مرکزی اڈہ ہے۔ اسرائیل کی بمباری اس وقت شدت اختیار کر گئی جب اسے اتوار کو خفیہ اطلاع ملی کہ حماس غزہ کی پٹی کے ایک ہسپتال سے اپنی سرگرمیاں چلا رہی ہے۔
آئی ڈی ایف کے ترجمان ہگاری نے کہا، "حماس نے اپنی فوجیں اور ہتھیار اسکولوں، مساجد، گھروں اور اقوام متحدہ کی تنصیبات کے نیچے اور اس کے آس پاس رکھے ہوئے ہیں۔” انہوں نے تصدیق کیے بغیر کہا کہ اسرائیل ہسپتالوں کے ارد گرد کے علاقوں کو نشانہ بنا رہا ہے۔