اسرائیل کا مقصد غزہ سے فلسطینیوں کی بے دخلی :نمائندہ اقوام متحدہ

اقوام متحدہ:نمائندہ خصوصی اقوامِ متحدہ پاؤلا گیویرا بیٹنکر کا کہنا ہے کہ اسرائیل غزہ سے فلسطینیوں کی بے دخلی کے منصوبے پر عمل پیرا ہے۔
یہ بات نمائندہ خصوصی اقوامِ متحدہ پاؤلا گیویرا بیٹنکر نے جاری کیے گئے بیان میں کہی ہے۔
ان کا مزید کہنا ہےکہ غزہ میں جگہ جگہ سے فلسطینیوں کی بے دخلی اور اسرائیلی حملے اس جانب اشارہ ہیں۔اقوامِ متحدہ کی نمائندہ خصوصی پاؤلا گیویرا بیٹنکر کا یہ بھی کہنا ہے کہ اسرائیل کا مقصد غزہ کی پوری آبادی کا انخلاء ہے-
دوسری جانب اسرائیلی فوج نے غزہ کے رہائشی علاقوں پر گزشتہ روز 100 سے زائد حملے کیے، خان یونس میں بے گھر فلسطینیوں کی پناہ گاہ فلسطینی ہلال احمر کے ہیڈ کوارٹر پر بھی بم باری کی۔اسرائیلی حملوں میں 1 روز میں 240 سے زیادہ فلسطینی شہید کر دیے گئے، شہداء کی مجموعی تعداد 20 ہزار 9 سے زیادہ ہو گئی۔غزہ میں انٹرنیٹ اور مواصلاتی سروسز پھر معطل کر دی گئیں۔
ادھر امریکی ایوانِ نمائندگان میں ڈیموکریٹک نمائندے لائیڈ ڈاگیٹ کا کہنا ہے کہ نتین یاہو سے شہریوں کی حفاظت کے لیے بھیک مانگنے کی امریکی پالیسی ناکام ہو گئی۔
عرب میڈیا کے مطابق امریکی ایوانِ نمائندگان میں ڈیموکریٹک نمائندے لائیڈ ڈاگیٹ نے اس حوالے سے بیان جاری کیا ہے۔ان کا کہنا ہے کہ امریکا نے اسرائیل کو ہتھیار بھیجے اور اقوامِ متحدہ کی قرارداد کو بھی روکا۔لائیڈ ڈاگیٹ کا یہ بھی ہنا ہے کہ جب تک نتین یاہو نتائج کا سامنا نہیں کریں گے، زیادہ معصوم شہری موت و بھوک کا سامنا کریں گے۔