الجزیرہ کے بیورو چیف وائل الدحدوح کا بیٹا اسرائیلی حملے میں جاں بحق،اب تک 106 جرنلسٹ مارے گئے

غزہ:الجزیرہ کے بیورو چیف وائل الدحدوح کے بیٹے اسرائیلی حملے میں شہید ہوگئے۔غزہ سے عرب میڈیا کے مطابق حمزہ الدحدوح، خان یونس میں اسرائیلی میزائل حملے میں شہید ہوئے۔ 
عرب میڈیا کے مطابق حمزہ الدحدوح خان یونس میں ساتھی صحافی کے ساتھ گاڑی میں سفر کر رہے تھے۔ عرب میڈیا کے مطابق الجزیرہ کے بیورو چیف کے دیگر اہلخانہ بھی اکتوبر میں اسرائیلی بمباری میں شہید ہو چکے ہیں۔ 
عرب میڈیا کے مطابق اکتوبر میں اسرائیلی حملے میں وائل الدوحدوح کی اہلیہ، بیٹا، بیٹی اور نواسا شہید ہوئے تھے۔ عرب میڈیا کے مطابق 7  اکتوبر سے اب تک غزہ میں اسرائیلی حملوں میں 109 صحافی شہید ہو چکے ہیں
اسی دوران اسرائیلی فوج نے خان یونس میں حملے بڑھا دیے جبکہ فلسطینی ہلال احمر کے اسپتال کے اطراف بھی اسرائیلی فوج نے شدید گولہ باری اور ڈرون سے فائرنگ کی۔
اسرائیلی فوج نے خان یونس کے گھر پر حملہ کیا جس میں 12 بچوں سمیت مزید 17 فلسطینی شہید اور 50 کے قریب زخمی ہو گئے۔
غیر ملکی میڈیا کے مطابق مغربی کنارے کے شہر جنین میں اسرائیل کے ڈرون حملے میں 6 فلسطینی شہید ہو گئے جن کے بارے میں بتایا گیا ہے کہ تمام افراد عام شہری تھے۔عرب میڈیا کے مطابق ڈرون حملے میں سڑک پر موجود شہریوں کو نشانہ بنایا گیا، جنین میں اسرائیلی فوج کی نفری بھی بڑی تعداد میں تعینات کر دی گئی ہے جبکہ اسرائیلی فوج کو فلسطینیوں کی جانب سے مزاحمت کا بھی سامنا کرنا پڑا ہے۔عرب میڈیا کے مطابق فلسطینی مزاحمت کاروں نے دھماکا خیز ڈیوائس سے اسرائیلی فوجی گاڑی کو تباہ کیا ہے۔
غزہ پر اسرائیل کے فضائی حملے میں فٹبال کوچ بھی شہید ہو گئے۔
غیر ملکی میڈیا کے مطابق اسرائیلی اسنائپر نے اسپتال کے پاس کھڑے نہتے فلسطینی کو گولی مار کر شہید کر دیا جبکہ اسرائیلی فوج کی مغربی کنارے میں بھی چھاپہ مار کارروائیاں جاری ہیں۔رپورٹس کے مطابق 7 اکتوبر سے اب تک مغربی کنارے میں 332 فلسطینی شہید اور 3 ہزار سے زائد زخمی ہوچکے ہیں جبکہ اسرائیلی چھاپا مار کارروائیوں میں 5 ہزار 600 فلسطینیوں کو گرفتار کیا جاچکا ہے-