سلمان خورشید بھی باغی ہوں گے؟فرخ آباد سیٹ ایس پی کو دینے سے ناراض، لڑیں گے آزاد.

فرخ آباد: کانگریس کے سینئر لیڈر اور سابق وزیر خارجہ سلمان خورشید پارٹی کے خلاف بغاوت کرنے کی تیاری کرتے نظر آرہے ہیں۔ وہ اس بات سے ناراض ہیں کہ فرخ آباد لوک سبھا سیٹ جس سے وہ لڑتے ہیں سیٹ شیئرنگ فارمولے کے تحت سماج وادی پارٹی کو دی گئی ہے۔ سماج وادی پارٹی نے بھی اس سیٹ سے نول کشور شاکیا کو اپنا امیدوار بنایا ہے۔  ایس پی اور کانگریس نے بدھ کو ‘انڈیا’ اتحاد کے تحت ریاست میں سیٹوں کی تقسیم کا باضابطہ اعلان کیا، جس کے تحت ریاست کی 80 سیٹوں میں سے، کانگریس رائے بریلی اور امیٹھی سمیت 17 سیٹوں پر اپنے امیدوار کھڑے کرے گی۔
خورشید نے ایکس پر کہا میں نہیں جھکوں گا۔
فرخ آباد لوک سبھا سیٹ سماج وادی پارٹی کے پاس جانے سے ناراض سلمان خورشید نے ‘ایکس’ پر کچھ لکھا، جس کے بعد ان کی بغاوت کی قیاس آرائیاں شروع ہوگئیں۔ خورشید نے سوشل میڈیا پلیٹ فارم پر لکھا، ‘فرخ آباد کے ساتھ میرے تعلقات کو کتنی آزمائش کا سامنا کرنا پڑے گا؟ سوال میرے بارے میں نہیں بلکہ ہم سب کے مستقبل کا ہے، آنے والی نسلوں کا ہے۔ تقدیر کے فیصلوں کے سامنے کبھی نہیں جھکے۔ میں ٹوٹ سکتا ہوں، لیکن جھکوں گا نہیں۔ آپ میرا ساتھ دینے کا وعدہ کریں، میں گانے گاتا رہوں گا۔‘‘ سیاسی پنڈتوں کا خیال ہے کہ سلمان خورشید آئندہ لوک سبھا الیکشن آزاد امیدوار کے طور پر لڑ سکتے ہیں۔
واضح ہوکہ دونوں پارٹیوں کے درمیان اتحاد کا اعلان ایس پی کے ریاستی صدر نریش اتم پٹیل، ایس پی کے قومی سکریٹری راجندر چودھری، کانگریس کے ریاستی صدر اجے رائے اور کانگریس کے اتر پردیش انچارج اویناش پانڈے نے مشترکہ پریس کانفرنس میں کیا۔ پانڈے نے کہا کہ کانگریس 17 سیٹوں پر انتخاب لڑے گی، جب کہ ایس پی اور دیگر اتحادی جماعتوں کے امیدوار ریاست کی باقی 63 سیٹوں پر لڑیں گے۔ ایس پی کے ریاستی صدر پٹیل نے کہا کہ کانگریس اترپردیش میں رائے بریلی، امیٹھی، کانپور نگر، فتح پور سیکری، بانسگاؤں، سہارنپور، پریاگ راج، مہاراج گنج، وارانسی، امروہہ، جھانسی، بلند شہر، غازی آباد، متھرا، سیتا پور، بارابنکی  دیوریا سمیت 17 سیٹوں پر الیکشن لڑیے گی-