فیروز آباد: سماج وادی پارٹی کے قومی جنرل سکریٹری پروفیسر رام گوپال یادو نے ہفتہ کو ایک ایسا بیان دیا ہے جو ہندوتو طبقہ کو پسند نہیں آئے گا ۔ میڈیا رپورٹس کے مطابق ا نہوں نے کہا ہے کہ بھگوان بدھ کے بنائے ہوئے بدھ استوپوں کو شنکراچاریہ نے گرایا تھا۔ شنکراچاریہ کے پیروکاروں نے مغل حکمران اورنگزیب کے ہاتھوں توڑے ہوئے مندروں سے زیادہ بودھ استوپوں کو توڑا تھا۔
رام گوپال یادو ہفتے کے روز فیروز آباد میں تھے، جہاں وہ سنت روی داس کے پیروکاروں سے ان کے یوم پیدائش پر خطاب کر رہے تھے۔ گاؤں نظام پور گدھوما میں منعقدہ پروگرام میں رام گوپال یادو نے سب سے پہلے بھگوان بدھ کے سامنے ڈنڈوت کیا اورپھر ان کے بارے میں اپنے خیالات کا اظہار کیا۔
انہوں نے کہا کہ جب ہندو مذہب میں ذات پات، اچھوت، امتیاز جیسی بہت سی برائیاں تھیں، تب بھگوان بدھ نے بدھ مت کو ایک تحریک کے طور پر قائم کیا تھا۔ بعد میں یہ بدھ مت اس قدر مقبول ہوا کہ نہ صرف ہندوستان بلکہ چین، سری لنکا، برما سمیت کئی ممالک میں پھیل گیا۔ اس مذہب کے پیروکاروں کی ایک بڑی تعداد اب بھی ان ممالک میں آباد ہے۔ انہوں نے کہا کہ جو جاگیردار تھے وہ غالب ہو چکے ہیں۔ اس نے ہندوستان سے بدھ مت کا تقریباً خاتمہ کر دیا تھا۔ ملک میں بدھ استوپا جو پیروکاروں نے بنائے تھے تقریباً منہدم ہو چکے تھے۔
انہوں نے دعوی کیا کہ اورنگ زیب نے جتنے مندروں کو تباہ کیا تھا اس سے 100 گنا زیادہ بودھ ستوپ آدی شنکر آچاریہ نے تباہ کئے۔ بعد میں بابا صاحب بھیم راؤ امبیڈکر نے اس برائی کے خلاف آواز اٹھائی۔ آج اقتدار میں موجودہ لوگ بھی یہی ذہنیت رکھتے ہیں۔
انہوں نے کہا کہ اقتدار سے وابستہ لوگ عام لوگوں کے بنیادی حقوق چھیننے کی کوشش کر رہے ہیں۔ پارلیمنٹ میں ایسے قوانین بنائے جا رہے ہیں جو آئین کی بنیادی روح کے خلاف ہیں۔ ہمیں اس کو روکنا ہوگا۔
