انکاؤنٹر اسپیشلسٹ  سابق پولیس افسر کوفرضی انکاؤنٹر کے جرم میں  سزائے عمر قید

ممبئی پولیس میں انکاؤنٹر اسپیشلسٹ کے طور پر جانے جانے والے سابق پولیس افسر پردیپ شرما کو 18 سال پرانے فرضی انکاؤنٹر کیس میں عمر قید کی سزا سنائی گئی ہے۔
انگریزی اخبار ٹائمز آف انڈیا کے مطابق بمبئی ہائی کورٹ نے سزا سناتے ہوئے پردیپ شرما کو تین ہفتوں کے اندر سرینڈر کرنے کو کہا ہے۔ مہاراشٹر میں پہلی بار کسی پولیس افسر کو انکاؤنٹر کیس میں قصوروار پایا گیا ہے۔
بمبئی ہائی کورٹ نے چھوٹا راجن گینگ کے رکن رام نارائن گپتا عرف لکھن بھیا کے فرضی انکاؤنٹر کیس میں پردیپ شرما کو سزا سنائی ہے۔
ہائی کورٹ نے سزا سناتے ہوئے کہا کہ یہ ثابت ہو گیا ہے کہ رام نارائن کو پولیس نے مارا تھا اور یہ بالکل واضح ہے کہ اسے فرضی انکاؤنٹر کا رنگ دیا گیا تھا۔
اس کے ساتھ ہی عدالت نے کہا کہ قانون کے محافظوں کو وردی میں مجرموں کی طرح کام کرنے کی اجازت نہیں دی جا سکتی۔
پردیپ شرما اپنی 25 سال کی پولیس سروس میں 112 مجرموں کا انکاؤنٹر کرنے کے لیے جانا جاتا ہے۔ انہیں 2008 میں انڈرورلڈ سے تعلق رکھنے کے الزام میں پولیس سروس سے برطرف کر دیا گیا تھا۔ تاہم، ٹریبونل نے انہیں 2017 میں بحال کر دیا۔