بی جے پی نے 25 بیرون ملک سیاسی پارٹیوں  کو لوک سبھا انتخابی عمل دیکھنے کے لیے مدعو کیا

بی جے پی نے لوک سبھا انتخابات 2024 کے عمل کو دیکھنے اور بی جے پی کی انتخابی مہم کو قریب سے سمجھنے کے لیے دنیا کے کئی ممالک سے تقریباً 25 بیرون ملک کی پارٹیوں کو مدعو کیا ہے۔ اس میں 13 نے اپنے وفد کے دورہ بھارت کی تصدیق کی ہے۔
انگریزی اخبار انڈین ایکسپریس کی ایک رپورٹ میں بی جے پی کی طرف سے بیرون ملک پارٹیوں کو دیے گئے اس دعوت نامے کے بارے میں تفصیلی معلومات دی گئی ہیں۔ رپورٹ میں کہا گیا ہے کہ لوک سبھا انتخابات کے دوران بی جے پی کی دعوت پر دنیا بھر کے کئی ممالک کی کئی پارٹیوں کے لیڈر انتخابات کو دیکھنے اور حکمران پارٹی کی مہم کی حکمت عملیوں کو سمجھنے کے لیے ہندوستان کا دورہ کرنے والے ہیں۔
بی جے پی نے اب تک بیرون ممالک سے 25 سے زائد جماعتوں کو دعوت نامے بھیجے ہیں کہ وہ اپنے نمائندوں کو بھارت کے لوک سبھا انتخابات کا مشاہدہ کرنے کے لیے بھیجیں، جسے دنیا کا سب سے بڑا جمہوری عمل کہا جاتا ہے۔ بی جے پی کے ذرائع نے بتایا کہ ان میں سے 13 نے اب تک اپنے ہندوستان آنے کی تصدیق کی ہے۔ پارٹی ان کی تفصیلات بعد میں ظاہر کرے گی۔
اس رپورٹ میں کہا گیا ہے کہ امریکہ کی دونوں جماعتوں، حکمران ڈیموکریٹس اور اپوزیشن ریپبلکنز میں سے کسی کو بھی مدعو نہیں کیا گیا ہے۔ اس کی وجہ بتاتے ہوئے بی جے پی کے ایک رہنما نے کہا، “پہلی بات تو یہ کہ وہ اپنے صدارتی انتخابات میں مصروف ہیں۔مزید برآں، امریکی پارٹیوں کا ڈھانچہ ہندوستان یا یورپ کے کچھ حصوں جیسا نہیں ہے۔ مثال کے طور پر، امریکہ میں، پارٹی کا کوئی کارکن اپنی پارٹی کے صدر کا نام نہیں جانتا، کیونکہ یہ نظام صرف صدر یا امریکی کانگریس کے دفتر کو نمایاں کرتا ہے۔
تاہم بی جے پی نے برطانیہ کی کنزرویٹو اور لیبر پارٹیوں اور جرمنی کی کرسچن ڈیموکریٹس اور سوشل ڈیموکریٹس کو مدعو کیا ہے۔
پڑوسی ملک بھارت کے خراب تعلقات کے پیش نظر پاکستان کی طرف سے کسی سیاسی جماعت کو مدعو نہیں کیا گیا۔ چین کی کمیونسٹ پارٹی (CPC) کو بھی مدعو نہیں کیا گیا ہے۔
ہمسایہ ملک بنگلہ دیش سے صرف حکمران شیخ حسینہ کی زیر قیادت عوامی لیگ کو مدعو کیا گیا ہے۔ حزب اختلاف بی این پی کو مدعو نہیں کیا گیا ہے کیونکہ اس نے حال ہی میں ہندوستانی سامان کے بائیکاٹ کے لیے سوشل میڈیا پر ‘انڈیا آؤٹ’ مہم شروع کی ہے۔
بی جے پی نے نیپال کی تمام بڑی سیاسی جماعتوں بشمول ماؤ نوازوں کو مدعو کیا ہے۔ یہی بات سری لنکا پر بھی لاگو ہوتی ہے جہاں تمام بڑی جماعتوں کو مدعو کیا گیا ہے۔